ಶಿಷ್ಯರ ಪಾದಸ್ನಾನ
1ಅಂದು
ಪಾಸ್ಕಹಬ್ಬದ ಹಿಂದಿನ ದಿನ. ತಾವು ಈ ಲೋಕವನ್ನು ಬಿಟ್ಟು ಪಿತನ ಬಳಿಗೆ ಹೋಗಬೇಕಾದ ಘಳಿಗೆ ಬಂದಿರುವುದೆಂದು
ಯೇಸುವಿಗೆ ತಿಳಿದಿತ್ತು. ಈ ಲೋಕದಲ್ಲಿದ್ದ ತಮ್ಮವರನ್ನು ಯಾವಾಗಲೂ ಪ್ರೀತಿಸುತ್ತಿದ್ದ ಅವರು ಆ ಪ್ರೀತಿಯ
ಪರಮಾವಧಿಯನ್ನು ಈಗ ತೋರಿಸಲಿದ್ದರು. 2(ಯೇಸುವನ್ನು ಗುರುದ್ರೋಹದಿಂದ
ಹಿಡಿದುಕೊಡಬೇಕೆಂಬ ಆಲೋಚನೆಯನ್ನು ಸೈತಾನನು ಸಿಮೋನನ ಮಗ ಇಸ್ಕರಿಯೋತಿನ ಯೂದನಲ್ಲಿ ಈಗಾಗಲೇ ಹುಟ್ಟಿಸಿದ್ದನು).
3ಊಟಕ್ಕೆ ಎಲ್ಲರೂ ಕುಳಿತಿದ್ದರು. ಪಿತನು ಎಲ್ಲವನ್ನೂ
ತಮ್ಮ ಕೈಗೆ ಒಪ್ಪಿಸಿರುವರೆಂದೂ ತಾವು ದೇವರ ಬಳಿಯಿಂದ ಬಂದಿದ್ದು, ಈಗ ದೇವರ ಬಳಿಗೆ ಮರಳುತ್ತಿದ್ದೇನೆ
ಎಂದೂ ಯೇಸುವಿಗೆ ತಿಳಿದಿತ್ತು. 4ಅವರು ಊಟವನ್ನು ಬಿಟ್ಟೆದ್ದು,
ತಮ್ಮ ಮೇಲುಹೊದಿಕೆಯನ್ನು ತೆಗೆದಿಟ್ಟರು. ಅಂಗವಸ್ತ್ರವನ್ನು ಸೊಂಟಕ್ಕೆ ಕಟ್ಟಿಕೊಂಡರು. 5ಅನಂತರ ಒಂದು ಬೋಗುಣಿಗೆ ನೀರು ಸುರಿದುಕೊಂಡು ತಮ್ಮ ಶಿಷ್ಯರ ಕಾಲುಗಳನ್ನು
ತೊಳೆಯುತ್ತಾ ತಾವು ಕಟ್ಟಿಕೊಂಡಿದ್ದ ಅಂಗವಸ್ತ್ರದಿಂದ ಒರಸತೊಡಗಿದರು. 6ಹೀಗೆ ಅವರು ಸಿಮೋನ ಪೇತ್ರನ ಹತ್ತಿರಕ್ಕೆ ಬಂದಾಗ ಆತನು,
"ಪ್ರಭುವೇ, ನೀವು ನನ್ನ ಕಾಲುಗಳನ್ನು ತೊಳೆಯುವುದೇ?"
ಎಂದನು.
7ಯೇಸು,
"ನಾನು ಮಾಡುತ್ತಿರುವುದು ನಿನಗೆ ಈಗ ಅರ್ಥವಾಗದು,
ಮುಂದೆ ಅರ್ಥವಾಗುತ್ತದೆ,"
ಎಂದು ಉತ್ತರಿಸಿದರು.
8"ನೀವು
ನನ್ನ ಕಾಲುಗಳನ್ನು ತೊಳೆಯುವುದು ಎಂದಿಗೂ ಕೂಡದು,"
ಎಂದು ಪೇತ್ರನು ಪ್ರತಿಭಟಿಸಿದನು.
ಅದಕ್ಕೆ ಯೇಸು,
"ನಾನು ತೊಳೆಯದಿದ್ದರೆ ನಿನಗೆ ನನ್ನಲ್ಲಿ ಪಾಲು ಇಲ್ಲ,"
ಎಂದು ನುಡಿದರು.
ಆಗ ಪೇತ್ರನು,
9"ಹಾಗಾದರೆ
ಪ್ರಭು, ನನ್ನ ಕಾಲುಗಳನ್ನು ಮಾತ್ರವಲ್ಲ, ನನ್ನ ಕೈಗಳನ್ನೂ ತಲೆಯನ್ನೂ ತೊಳೆಯಿರಿ,"
ಎಂದನು.
ಯೇಸು,
10"ಸ್ನಾನ
ಮಾಡಿಕೊಂಡವನು ಕಾಲುಗಳನ್ನು ತೊಳೆದುಕೊಂಡರೆ ಸಾಕು. ಅವನ ಮೈಯೆಲ್ಲಾ ಶುದ್ಧವಾಗಿರುತ್ತದೆ. ನೀವೂ ಕೂಡ
ಶುದ್ಧರಾಗಿದ್ದೀರಿ. ಆದರೆ ನಿಮ್ಮಲ್ಲಿ ಎಲ್ಲರೂ ಶುದ್ಧರಲ್ಲ,"
ಎಂದು ಹೇಳಿದರು. 11ತಮ್ಮನ್ನು ಗುರುದ್ರೋಹ ಮಾಡಿ ಹಿಡಿದುಕೊಡುವವನು ಯಾರೆಂಬುದು ಅವರಿಗೆ ತಿಳಿದಿತ್ತು.
ಅದಕ್ಕಾಗಿಯೇ ಅವರು, 'ನಿಮ್ಮಲ್ಲಿ ಎಲ್ಲರೂ ಶುದ್ಧರಲ್ಲ,' ಎಂದು ಹೇಳಿದ್ದು.
12ಶಿಷ್ಯರ
ಪಾದಗಳನ್ನು ತೊಳೆದ ಮೇಲೆ ಯೇಸು ತಮ್ಮ ಮೇಲು ಹೊದಿಕೆಯನ್ನು ಹಾಕಿಕೊಂಡು ಕುಳಿತುಕೊಂಡರು. ತಮ್ಮ ಶಿಷ್ಯರಿಗೆ,
"ನಿಮಗೆ ನಾನು ಮಾಡಿರುವುದೇನೆಂದು ಅರ್ಥವಾಯಿತೇ? 13ಬೋಧಕರೇ, ಪ್ರಭುವೇ ಎಂದು ನೀವು ನನ್ನನ್ನು ಕರೆಯುತ್ತೀರಿ; ನೀವು ಹಾಗೆ
ಹೇಳುವುದು ಸರಿಯೇ. ನಾನು ಬೋಧಕನೂ ಹೌದು, ಪ್ರಭುವೂ ಹೌದು. 14ನಿಮಗೆ ಪ್ರಭುವೂ ಬೋಧಕನೂ ಆಗಿರುವ ನಾನೇ ನಿಮ್ಮ ಕಾಲುಗಳನ್ನು ತೊಳೆದಿರುವಾಗ
ನೀವೂ ಸಹ ಒಬ್ಬರ ಕಾಲುಗಳನ್ನು ಇನ್ನೊಬ್ಬರು ತೊಳೆಯುವ ಹಂಗಿನಲ್ಲಿದ್ದೀರಿ. 15ನಾನು ನಿಮಗೆ ಒಂದು ಆದರ್ಶವನ್ನು ಕೊಟ್ಟಿದ್ದೇನೆ. ನಾನು ನಿಮಗೆ ಮಾಡಿದಂತೆಯೇ
ನೀವೂ ಇತರರಿಗೆ ಮಾಡಿರಿ. 16ನಾನು ನಿಮಗೆ ಸತ್ಯವಾಗಿ ಹೇಳುತ್ತೇನೆ:
ಧಣಿಗಿಂತ ದಾಸನು ದೊಡ್ಡವನಲ್ಲ. ಅಂತೆಯೇ ಕಳುಹಿಸಿದವರಿಗಿಂತ ಕಳುಹಿಸಲಾದವನು ಶ್ರೇಷ್ಟನಲ್ಲ. 17ಇದನ್ನೆಲ್ಲಾ ಅರ್ಥಮಾಡಿಕೊಂಡು ಅದರಂತೆ ನಡೆದರೆ, ನೀವು ಧನ್ಯರು. 18ನಾನು ನಿಮ್ಮೆಲ್ಲರನ್ನೂ ಕುರಿತು ಹೀಗೆ ಹೇಳುತ್ತಾ ಇಲ್ಲ. ಯಾರನ್ನು ನಾನು
ಆರಿಸಿಕೊಂಡಿದ್ದೇನೆಂಬುದು ನನಗೆ ಗೊತ್ತು. ಆದರೆ 'ನನ್ನೊಡನೆ ಉಂಡವನೇ ನನಗೆ ದ್ರೋಹ ಬಗೆದನು' ಎಂಬುದಾಗಿ
ಪವಿತ್ರಗ್ರಂಥದಲ್ಲಿ ಬರೆದಿದೆ. ಆ ಮಾತು ಈಡೇರಬೇಕಾಗಿದೆ. 19ಅದು ಈಡೇರುವಾಗ 'ಇರುವಾತನು ನಾನೇ' ಎಂದು ನೀವು ವಿಶ್ವಾಸಿಸುವಂತೆ ಅದು
ಈಡೇರುವುದಕ್ಕೆ ಮುಂಚೆಯೇ ನಿಮಗೆ ಹೇಳುತ್ತಿದ್ದೇನೆ. 20ನಾನು
ಕಳುಹಿಸಿದಾತನನ್ನು ಬರಮಾಡಿಕೊಳ್ಳುವವನು ನನ್ನನ್ನೇ ಬರಮಾಡಿಕೊಳ್ಳುತ್ತಾನೆ. ನನ್ನನ್ನು ಬರಮಾಡಿಕೊಳ್ಳುವವನು
ನನ್ನನ್ನು ಕಳುಹಿಸಿದವರನ್ನೇ ಬರಮಾಡಿಕೊಳ್ಳುತ್ತಾರೆಂದು ನಿಮಗೆ ಸತ್ಯವಾಗಿ ಹೇಳುತ್ತೇನೆ,"
ಎಂದರು.
ಗುರುದ್ರೋಹ
21ಇದೆಲ್ಲವನ್ನೂ
ಹೇಳಿಯಾದ ಮೇಲೆ ಯೇಸು ಮನಸ್ಸಿನಲ್ಲಿ ಬಹಳವಾಗಿ ನೊಂದುಕೊಂಡರು. ಅವರು,
"ನಾನು ನಿಮಗೆ ಸತ್ಯವಾಗಿ ಹೇಳುತ್ತೇನೆ; ನಿಮ್ಮಲ್ಲೊಬ್ಬನು
ದ್ರೋಹ ಬಗೆದು ನನ್ನನ್ನು ಹಿಡಿದು ಒಪ್ಪಿಸುವನು,"
ಎಂದು ಸ್ಪಷ್ಟವಾಗಿ ಹೇಳಿದರು.
22ಯೇಸು
ಯಾರನ್ನು ಕುರಿತು ಹಾಗೆಂದರೆಂದು ತಿಳಿಯದೆ ಶಿಷ್ಯರು ಒಬ್ಬರನ್ನೊಬ್ಬರು ಸಂಶಯದಿಂದ ನೋಡಿದರು.
23ಯೇಸುವಿನ
ಪಕ್ಕದಲ್ಲೇ ಒರಗಿ ಕುಳಿತಿದ್ದ ಅವರ ಆಪ್ತಶಿಷ್ಯನಿಗೆ 24ಸಿಮೋನ
ಪೇತ್ರನು, 'ಯಾರನ್ನು ಕುರಿತು ಹಾಗೆ ಹೇಳುತ್ತಿದ್ದಾರೆಂದು ಕೇಳು,' ಎಂದು ಸನ್ನೆ ಮಾಡಿದನು.
25ಆಗ
ಆ ಶಿಷ್ಯನು ಯೇಸುವಿನ ಮಗ್ಗುಲಿಗೆ ಸರಿದು,
"ಅಂಥವನು ಯಾರು ಪ್ರಭು?"
ಎಂದು ಕೇಳಿದನು.
ಯೇಸು,
26"ನಾನು
ರೊಟ್ಟಿಯ ತುಂಡನ್ನು ಬಟ್ಟಲಿನಲ್ಲಿ ಅದ್ದಿ ಅದನ್ನು ಯಾರಿಗೆ ಕೊಡುತ್ತೇನೋ ಅವನೇ,"
ಎಂದು ಹೇಳಿ ರೊಟ್ಟಿಯ ತುಂಡನ್ನು ಅದ್ದಿ ಸಿಮೋನನ ಮಗ ಇಸ್ಕಾರಿಯೋತಿನ
ಯೂದನಿಗೆ ಕೊಟ್ಟರು. 27ಯೂದನು ಅದನ್ನು ತೆಗೆದುಕೊಂಡದ್ದೇ
ತಡ ಸೈತಾನನು ಅವನನ್ನು ಹೊಕ್ಕನು.
28ಆಗ
ಯೇಸು,
"ನೀನು ಮಾಡಬೇಕೆಂದಿರುವುದನ್ನು ಬೇಗನೆ ಮಾಡಿ ಮುಗಿಸು,"
ಎಂದರು.
ಊಟಕ್ಕೆ ಕುಳಿತಿದ್ದ ಶಿಷ್ಯರಿಗೆ ಯೆಸು ಹಾಗೇಕೆ ಹೇಳಿದರೆಂದು
ತಿಳಿಯಲಿಲ್ಲ. 29ಯೂದನ ವಶದಲ್ಲಿ ಹಣದ ಚೀಲವಿದ್ದುದರಿಂದ,
'ಹಬ್ಬಕ್ಕೆ ನಮಗೆ ಬೇಕಾದುದನ್ನು ತೆಗೆದುಕೊಂಡು ಬಾ' ಎಂದೋ, 'ಬಡವರಿಗೆ ಏನನ್ನಾದರೂ ಕೊಡು' ಎಂದೋ ಯೇಸು
ಹೇಳಿರಬೇಕು ಎಂದು ಕೆಲವು ಶಿಷ್ಯರು ಭಾವಿಸಿದರು.
30ಆ
ರೊಟ್ಟಿಯ ತುಂಡನ್ನು ತೆಗೆದುಕೊಂಡ ಕೂಡಲೇ ಯೂದನು ಎದ್ದು ಹೊರಟುಹೋದನು. ಆಗ ರಾತ್ರಿಯಾಗಿತ್ತು.
ಹೊಸ ಕಟ್ಟಳೆ
31ಯೂದನು
ಹೊರಟುಹೋದ ಮೇಲೆ ಯೇಸು ಹೀಗೆಂದರು;
"ಈಗ ನರಪುತ್ರನ ಮಹಿಮೆಯು ಪ್ರಕಟವಾಗುತ್ತದೆ. ಆತನಲ್ಲಿ
ದೇವರ ಮಹಿಮೆಯೂ ಪ್ರಕಟವಾಗುತ್ತದೆ. 32ದೇವರ ಮಹಿಮೆಯು ಆತನಲ್ಲಿ ಪ್ರಕಟವಾದರೆ,
ದೇವರೇ ನರಪುತ್ರನ ಮಹಿಮೆಯನ್ನು ತಮ್ಮಲ್ಲಿ ಪ್ರಕಟಪಡಿಸುತ್ತಾರೆ. ತಕ್ಷಣವೇ ಪ್ರಕಟಪಡಿಸುತ್ತಾರೆ. 33ಪ್ರಿಯ ಮಕ್ಕಳೇ, ಇನ್ನು ತುಸುಕಾಲ ಮಾತ್ರ ನಾನು ನಿಮ್ಮೊಡನೆ ಇರುತ್ತೇನೆ.
ಆಮೇಲೆ ನೀವು ನನ್ನನ್ನು ಹುಡುಕುವಿರಿ. ಆದರೆ 'ನಾನು ಹೋಗುವಲ್ಲಿಗೆ ನೀವು ಬರಲಾರಿರಿ' ಎಂದು ನಾನು
ಯೆಹೂದ್ಯರಿಗೆ ಹೇಳಿದಂತೆಯೇ ನಿಮಗೂ ಹೇಳುತ್ತೇನೆ. 34ನಿಮಗೊಂದು
ಹೊಸ ಆಜ್ಞೆಯನ್ನು ಕೊಡುತ್ತೇನೆ. ಒಬ್ಬರನ್ನೊಬ್ಬರು
ಪ್ರೀತಿಸಿರಿ. ನಾನು ನಿಮ್ಮನ್ನು ಪ್ರೀತಿಸಿರುವಂತೆಯೇ ನೀವೂ ಸಹ ಒಬ್ಬರನ್ನೊಬ್ಬರು ಪ್ರೀತಿಸಿರಿ. 35ನಿಮ್ಮ ಈ ಪರಸ್ಪರ ಪ್ರೀತಿಯನ್ನು ಕಂಡು ನೀವು ನನ್ನ ಶಿಷ್ಯರೆಂದು ಜನರೆಲ್ಲರೂ
ಅರಿತುಕೊಳ್ಳುವರು,"
ಅಲ್ಲಗೆಳೆಯುವಿಕೆಯ ಮುನ್ಸೂಚನೆ
36ಆಗ
ಸಿಮೋನ ಪೇತ್ರನು,
"ಪ್ರಭುವೇ, ನೀವು ಹೋಗುವುದಾದರೂ ಎಲ್ಲಿಗೆ?"
ಎಂದು ಕೇಳಿದನು.
"ನಾನು ಹೋಗುವಲ್ಲಿಗೆ ನೀನು ಈಗ ಬರಲಾರೆ; ಅನಂತರ ಬರುವೆ"
ಎಂದು ಯೇಸು ಉತ್ತರಕೊಡಲು 37ಪೇತ್ರನು,
"ಈಗಲೇ ನಿಮ್ಮ ಹಿಂದೆ ಬರಲು ಏಕೆ ಸಾಧ್ಯವಿಲ್ಲ? ಪ್ರಭೂ,
ನಿಮಗಾಗಿ ಪ್ರಾಣವನ್ನು ಕೊಡಲೂ ಸಿದ್ಧನಿದ್ದೇನೆ,"
ಎಂದನು.
38ಆಗ
ಯೇಸು,
"ನನಗಾಗಿ ಪ್ರಾಣವನ್ನು ಕೊಡಲೂ ಸಿದ್ಧನಿರುವೆಯಾ? ನಾನು
ನಿನಗೆ ಸತ್ಯವಾಗಿ ಹೇಳುತ್ತೇನೆ ಕೇಳು; ನೀನು ನನ್ನನ್ನು ಅರಿಯೆನೆಂದು ಮೂರು ಬಾರಿ ತಿರಸ್ಕರಿಸುವ ತನಕ
ನಾಳೆ ಮುಂಜಾನೆ ಕೋಳಿ ಕೂಗುವುದೇ ಇಲ್ಲ,"
ಎಂದು ನುಡಿದರು.
ಅಧ್ಯಾಯಗಳು
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್‌ ಮಾಡಿ