ಯೊವಾನ್ನನು ಬರೆದ ಸುಸಂದೇಶ: ಅಧ್ಯಾಯ 18

ಯೇಸುವಿನ ಬಂಧನ

(ಮತ್ತಾಯ ೨೬:೪೭-೫೬; ಮಾರ್ಕ ೧೪:೪೩-೫೦; ಲೂಕ ೨೨:೪೭-೫೩)

¹ಯೇಸು ಹೀಗೆ ಹೇಳಿದ ಬಳಿಕ ತಮ್ಮ ಶಿಷ್ಯರೊಡನೆ ಹೊರಟು, ಕೆದ್ರೋನ್‌ ಹಳ್ಳವನ್ನು ದಾಟಿ, ಅಲ್ಲೇ ಇದ್ದ ತೋಟವನ್ನು ಹೊಕ್ಕರು. ²ಅವರು ತಮ್ಮ ಶಿಷ್ಯರೊಡನೆ ಆಗಾಗ ಅಲ್ಲಿಗೆ ಬರುವುದು ವಾಡಿಕೆ. ಅವರನ್ನು ಹಿಡಿದುಕೊಡಲಿದ್ದ ಯೂದನಿಗೆ ಆ ಸ್ಥಳವು ಚೆನ್ನಾಗಿ ಗೊತ್ತಿತ್ತು. ³ಆದುದರಿಂದ ಯೂದನು ಸೈನಿಕರ ಒಂದು ತಂಡವನ್ನೂ ಮುಖ್ಯಯಾಜಕರು ಮತ್ತು ಫರಿಸಾಯರು ಕಳುಹಿಸಿದ ಕಾವಲಾಳುಗಳನ್ನೂ ಕರೆದುಕೊಂಡು ದೀವಟಿಗೆ, ಪಂಜು ಮತ್ತು ಆಯುಧಗಳ ಸಮೇತ ಅಲ್ಲಿಗೆ ಬಂದರು. ⁴ಯೇಸುವಿಗೆ ತಮಗೇನು ಸಂಭವಿಸಲಿದೆ ಎಂಬುದೆಲ್ಲಾ ತಿಳಿದಿತ್ತು. ಹಾಗಾಗಿಯೇ ಅವರು ಮುಂದೆ ಬಂದು,

"ಯಾರನ್ನು ಹುಡುಕುತ್ತಿದ್ದೀರಿ?"

ಎಂದು ಕೇಳಿದರು.

⁵ಅವರು,

"ನಜರೇತಿನ ಯೇಸುವನ್ನು,"

ಎಂದರು.

ಅದಕ್ಕೆ ಯೇಸು,

⁶"ನಾನೇ ಆತನು,"

ಎಂದು ಉತ್ತರಕೊಟ್ಟರು. ಅವರನ್ನು ಹಿಡಿದುಕೊಡಲಿದ್ದ ಗುರುದ್ರೋಹಿ ಯೂದನು ಅವರ ಸಂಗಡವೇ ನಿಂತುಕೊಂಡಿದ್ದನು. 'ನಾನೇ ಆತನು' ಎಂದು ಯೇಸು ನುಡಿಯುತ್ತಲೇ, ಅವರೆಲ್ಲರೂ ಹಿಂದಕ್ಕೆ ಸರಿದು ನೆಲದ ಮೇಲೆ ಬಿದ್ದರು. ⁷ಯೇಸು ಮತ್ತೊಮ್ಮೆ,

"ನೀವು ಯಾರನ್ನು ಹುಡುಕುತ್ತಿದ್ದೀರಿ?"

ಎಂದು ಕೇಳಲು,

"ನಜರೇತಿನ ಯೇಸುವನ್ನು"

ಎಂಬ ಉತ್ತರ ಬಂದಿತು.

⁸ಅದಕ್ಕೆ ಯೇಸು,

"ನಾನೇ ಆತನೆಂದು ನಿಮಗೆ ಆಗಲೇ ಹೇಳಿದೆ. ನೀವು ಹುಡುಕುತ್ತಿರುವುದು ನನ್ನನ್ನೇ ಆದರೆ ಮಿಕ್ಕ ಇವರನ್ನು ಹೋಗಲು ಬಿಡಿರಿ,"

ಎಂದು ನುಡಿದರು. ⁹('ನೀವು ನನಗೆ ಕೊಟ್ಟವರಲ್ಲಿ ಒಬ್ಬನನ್ನಾದರೂ ಕಳೆದುಕೊಳ್ಳಲಿಲ್ಲ' ಎಂದು ತಾವೇ ನುಡಿದ ಮಾತು ನೆರವೇರುವಂತೆ ಯೇಸು ಹೀಗೆಂದರು). ¹⁰ಅಷ್ಟರಲ್ಲಿ ಸಿಮೋನ ಪೇತ್ರನು ತನ್ನಲ್ಲಿದ್ದ ಖಡ್ಗವನ್ನು ಹಿರಿದು, ಪ್ರಧಾನ ಯಾಜಕನ ಸೇವಕನಾದ ಮಾಲ್ಕನ ಬಲಗಿವಿಯನ್ನು ಕತ್ತರಿಸಿಬಿಟ್ಟನು. ¹¹ಆಗ ಯೇಸು ಪೇತ್ರನಿಗೆ,

"ನಿನ್ನ ಖಡ್ಗವನ್ನು ಒರೆಯಲ್ಲಿ ಹಾಕು. ನನ್ನ ಪಿತನೇ ಕೊಟ್ಟಿರುವ ಕಷ್ಟದ ಕೊಡವಿದು; ಇದರಲ್ಲಿರುವುದನ್ನು ನಾನು ಕುಡಿಯದೇ ಹೋದರೆ ಹೇಗೆ?"

ಎಂದು ನುಡಿದರು.

ಅನ್ನನ ಮುಂದೆ ಯೇಸು

¹²ಅನಂತರ ಸೈನಿಕರೂ ಸಹಸ್ರಾಧಿಪತಿಯೂ ಯೆಹೂದ್ಯರು ಕಳುಹಿಸಿದ ಕಾವಲಾಳುಗಳು ಯೇಸುವನ್ನು ಹಿಡಿದು ಕಟ್ಟಿ ಮೊದಲು ಅನ್ನನ ಬಳಿಗೆ ಕೊಂಡೊಯ್ದರು. ¹³ಅನ್ನನು ಆ ವರ್ಷ ಪ್ರಧಾನಯಾಜಕನಾಗಿದ್ದ ಕಾಯಫನ ಮಾವ. ¹⁴ಸಮಸ್ತ ಜನತೆಗೋಸ್ಕರ ಒಬ್ಬನು ಸತ್ತರೆ ವಿಹಿತವೆಂದು ಸಲಹೆ ಕೊಟ್ಟವನು ಈ ಕಾಯಫನೇ.

ಗುರುವನ್ನು ಅಲ್ಲಗೆಳೆದ ಪೇತ್ರ

(ಮತ್ತಾಯ ೨೬:೬೯-೭೦; ಮಾರ್ಕ ೧೪:೬೬-೬೮; ಲೂಕ ೨೨:೫೫-೫೭)

¹⁵ಸಿಮೋನ್‌ ಪೇತ್ರನು ಪ್ರಧಾನಯಾಜಕನಿಗೆ ಪರಿಚಿತನಾಗಿದ್ದ ಇನ್ನೊಬ್ಬ ಶಿಷ್ಯನೊಂದಿಗೆ ಯೇಸುವನ್ನು ಹಿಂಬಾಲಿಸುತ್ತಾ ಹೋದನು. ಪರಿಚಿತನಾಗಿದ್ದ ಶಿಷ್ಯನು ಯೇಸುವಿನೊಡನೆ ಪ್ರಧಾನಯಾಜಕನ ಮನೆಯ ಅಂಗಳವನ್ನು ಹೊಕ್ಕನು. ¹⁶ಪೇತ್ರನು ಹೊರಗಡೆ ಬಾಗಿಲ ಬಳಿಯೇ ನಿಂತನು. ಪರಿಚಿತನಾಗಿದ್ದವನು ಅನಂತರ ಹೊರಬಂದು ದ್ವಾರಪಾಲಕಿಗೆ ಹೇಳಿ ಪೇತ್ರನನ್ನು ಒಳಕ್ಕೆ ಕರೆದುಕೊಂಡು ಹೋದನು. ¹⁷ಆ ದ್ವಾರಪಾಲಕಿಯು ಪೇತ್ರನನ್ನು ನೋಡಿ,

"ನೀನೂ ಯೇಸುವಿನ ಶಿಷ್ಯರಲ್ಲಿ ಒಬ್ಬನಲ್ಲವೇ?"

ಎಂದು ಕೇಳಿದಳು.

ಅದಕ್ಕೆ ಪೇತ್ರನು,

"ಇಲ್ಲ, ನಾನಲ್ಲ"

ಎಂದುಬಿಟ್ಟನು. ¹⁸ಆಗ ಚಳಿಯಿದ್ದುದರಿಂದ ಸೇವಕರೂ ಕಾವಲಾಳುಗಳೂ ಇದ್ದಲಿನ ಬೆಂಕಿ ಮಾಡಿ ಸುತ್ತಲೂ ನಿಂತು ಚಳಿ ಕಾಯಿಸಿಕೊಳ್ಳುತ್ತಿದ್ದರು. ಪೇತ್ರನೂ ಅವರ ಸಂಗಡ ನಿಂತುಕೊಂಡು ಚಳಿ ಕಾಯಿಸಿಕೊಳ್ಳುತ್ತಿದ್ದನು.

ಪ್ರಧಾನಯಾಜಕನಿಂದ ವಿಚಾರಣೆ

(ಮತ್ತಾಯ ೨೬:೫೯-೬೬; ಮಾರ್ಕ ೧೪:೫೫-೬೪; ಲೂಕ ೨೨:೬೬-೭೧)

¹⁹ಅಷ್ಟರಲ್ಲಿ ಪ್ರಧಾನಯಾಜಕನು ಯೇಸುವನ್ನು ಅವರ ಶಿಷ್ಯರ ವಿಷಯವಾಗಿಯೂ ಬೋಧನೆಯ ವಿಷಯವಾಗಿಯೂ ವಿಚಾರಿಸಿದನು. ²⁰ಆಗ ಯೇಸು, "ಜನರೆಲ್ಲರೂ ಕೇಳುವಂತೆ ನಾನು ಬಹಿರಂಗವಾಗಿಯೇ ಮಾತನಾಡಿದ್ದೇನೆ; ಯೆಹೂದ್ಯರೆಲ್ಲರೂ ಸಭೆ ಸೇರುವ ಪ್ರಾರ್ಥನಾಮಂದಿರಗಳಲ್ಲೂ ಮಹಾದೇವಾಲಯದಲ್ಲೂ ನಾನು ಯಾವಾಗಲೂ ಬೋಧನೆ ಮಾಡಿಕೊಂಡು ಬಂದಿದ್ದೇನೆ. ಮುಚ್ಚುಮರೆಯಾಗಿ ಏನನ್ನೂ ಹೇಳಿಲ್ಲ. ²¹ನನ್ನನ್ನು ವಿಚಾರಿಸುವುದೇಕೆ? ನಾನು ಹೇಳಿದ್ದನ್ನು ಯಾರು ಕೇಳಿದ್ದಾರೋ ಅವರನ್ನೇ ವಿಚಾರಿಸಿರಿ. ನಾನು ಬೋಧನೆ ಮಾಡಿದ್ದುದ್ದೇನೆಂದು ಅವರು ಬಲ್ಲರು,"

ಎಂದು ಉತ್ತರಕೊಟ್ಟರು. ²²ಯೇಸು ಹೀಗೆ ಹೇಳುವಾಗ ಬಳಿಯಲ್ಲೇ ನಿಂತಿದ್ದ ಕಾವಲುಭಟನೊಬ್ಬನು,

"ಪ್ರಧಾನಯಾಜಕರಿಗೆ ಉತ್ತರಕೊಡುವುದು ಹೀಗಾ?"

ಎನ್ನುತ್ತಾ ಕೆನ್ನೆಗೆ ಹೊಡೆದನು.

²³ಆಗ ಯೇಸು,

"ನಾನಾಡಿದ ಮಾತು ತಪ್ಪಾಗಿದ್ದರೆ, ಆ ತಪ್ಪನ್ನು ತೋರಿಸಿಕೊಡು; ಸತ್ಯವಾಗಿದ್ದರೆ ಏಕೆ ಹೊಡೆಯುವೆ?"

ಎಂದರು. ²⁴ಆಗ ಅನ್ನನು ಯೇಸುವನ್ನು ಬಂಧಿಸಿ ಕಾಯಫನ ಬಳಿಗೆ ಕಳುಹಿಸಿದನು.

ಮತ್ತೊಮ್ಮೆ ಅಲ್ಲಗೆಳೆದ ಪೇತ್ರ

(ಮತ್ತಾಯ ೨೬:೭೧-೭೫; ಮಾರ್ಕ ೧೪:೬೯-೭೨; ಲೂಕ ೨೨:೫೮-೬೨)

²⁵ಇತ್ತ ಪೇತ್ರನು ನಿಂತು ಚಳಿಕಾಯಿಸಿಕೊಳ್ಳುತ್ತಾ ಇದ್ದನು. ಅಲ್ಲಿದ್ದವರು,

"ನೀನು ಯೇಸುವಿನ ಶಿಷ್ಯರಲ್ಲಿ ಒಬ್ಬನಲ್ಲವೇ?"

ಎಂದು ಕೇಳಿದರು.

ಪೇತ್ರನು,

"ಇಲ್ಲ, ನಾನು ಶಿಷ್ಯನಲ್ಲ,"

ಎಂದು ನಿರಾಕರಿಸಿದನು. ²⁶ಪ್ರಧಾನಯಾಜಕನ ಸೇವಕರಲ್ಲಿ ಒಬ್ಬನು(ಪೇತ್ರನು ಯಾರ ಕಿವಿಯನ್ನು ಕತ್ತರಿಸಿದನೋ ಅವನ ನೆಂಟನೀತ),

"ನಿನ್ನನ್ನು ಆತನೊಡನೆ ತೋಟದಲ್ಲಿ ನಾನು ನೋಡಲಿಲ್ಲವಾ?"

ಎಂದು ಕೇಳಿದನು. ²⁷ಪೇತ್ರನು ಪುನಃ ಅಲ್ಲಗೆಳೆದನು. ಕೂಡಲೇ ಕೋಳಿ ಕೂಗಿತು.

ಪಿಲಾತನ ಮುಂದೆ ಯೇಸು

(ಮತ್ತಾಯ ೨೭:೧-೨; ೧೧-೧೪; ಮಾರ್ಕ ೧೫:೧-೫; ಲೂಕ ೨೩:೧-೫)

²⁸ಆಮೇಲೆ ಅವರು ಯೇಸುವನ್ನು ಕಾಯಫನ ಮನೆಯಿಂದ ರಾಜ್ಯಪಾಲನ ನಿವಾಸಕ್ಕೆ ಕೊಂಡೊಯ್ದರು. ಆಗ ಮುಂಜಾನೆ ಅರಮನೆಯೊಳಗೆ ಹೋದರೆ ಮಡಿಗೆಟ್ಟು ಹಬ್ಬದೂಟಕ್ಕೆ ಅಡ್ಡಿಯಾದೀತೆಂದು ಹೊರಗೆ ನಿಂತರು. ²⁹ಆದುದರಿಂದ ಪಿಲಾತನೇ ಅವರ ಬಳಿಗೆ ಬಂದು,

"ಈತನ ಮೇಲೆ ನಿಮ್ಮ ದೂರೇನು?"

ಎಂದು ಕೇಳಿದನು.

³⁰ಅವರು,

"ಇವನು ಅಪರಾದಿಯಲ್ಲದಿದ್ದರೆ ಇವನನ್ನು ನಿಮ್ಮಲ್ಲಿಗೆ ತಂದೊಪ್ಪಿಸುತ್ತಿರಲಿಲ್ಲ,"

ಎಂದರು.

³¹ಅದಕ್ಕೆ ಪಿಲಾತನು,

"ಹಾಗಾದರೆ ನೀವೇ ಕರೆದುಕೊಂಡು ಹೋಗಿ ನಿಮ್ಮ ಧರ್ಮಶಾಸ್ತ್ರದ ಪ್ರಕಾರ ಈತನಿಗೆ ತೀರ್ಪುಕೊಡಿ,"

ಎಂದನು. ಯೆಹೂದ್ಯರು,

"ಮರಣದಂಡನೆ ವಿಧಿಸುವ ಅಧಿಕಾರ ನಮಗಿಲ್ಲವಲ್ಲಾ,"

ಎಂದು ಉತ್ತರಿಸಿದರು. ³²ಯೇಸು ತಮಗೆ ಯಾವ ಬಗೆಯ ಮರಣ ಕಾದಿರುವುದೆಂದು ಸೂಚಿಸಿ ಹೇಳಿದ ಮಾತು ನೆರವೇರುವಂತಾಯಿತು. ³³ಆಗ ಪಿಲಾತನು ಅರಮನೆಯೊಳಕ್ಕೆ ಹೋಗಿ ಯೇಸುವನ್ನು ಕರೆಯಿಸಿ,

"ಯೆಹೂದ್ಯರ ಅರಸನೋ ನೀನು?"

ಎಂದು ಕೇಳಿದನು. ³⁴ಅದಕ್ಕೆ ಯೇಸು, "ನೀವಾಗಿಯೇ ಇದನ್ನು ಹೇಳುತ್ತಿರುವಿರಾ ಅಥವಾ ಬೇರೆ ಯಾರಾದರೂ ನನ್ನನ್ನು ಕುರಿತು ಹೀಗೆ ಹೇಳಿದರೇ?"

ಎನ್ನಲು ³⁵ಪಿಲಾತನು,

"ನಾನೇನು ಯೆಹೂದ್ಯನೇ? ನಿನ್ನ ಸ್ವಂತ ಜನರು ಮತ್ತು ಮುಖ್ಯಯಾಜಕರು ನಿನ್ನನ್ನು ನನ್ನ ಕೈಗೆ ಒಪ್ಪಿಸಿರುವರು. ನೀನು ಮಾಡಿದ್ದಾದರೂ ಏನು?"

ಎಂದು ಕೇಳಿದನು.

³⁶ಅದಕ್ಕೆ ಯೇಸು,

"ನನ್ನ ಸಾಮ್ರಾಜ್ಯವು ಈ ಲೋಕದ್ದಲ್ಲ. ನನ್ನ ಸಾಮ್ರಾಜ್ಯವು ಈ ಲೋಕದ್ದಾಗಿದ್ದರೆ, ಯೆಹೂದ್ಯರ ಕೈಗೆ ಬೀಳದಂತೆ ನನ್ನ ಅನುಯಾಯಿಗಳು ಕಾದಾಡುತ್ತಿದ್ದರು. ನಿಜವಾಗಿಯೂ ನನ್ನ ಸಾಮ್ರಾಜ್ಯ ಇಹಲೋಕದ್ದಲ್ಲ,"

ಎಂದರು.

³⁷ಪಿಲಾತನು,

"ಹಾಗಾದರೆ ನೀನೊಬ್ಬ ಅರಸನಾ?"

ಎಂದು ಕೇಳಲು ಯೇಸು,

"ಅರಸ ಎನ್ನುವುದು ನೀವು ಹೇಳುವ ಮಾತು. ಸತ್ಯವನ್ನು ಕುರಿತು ಸಾಕ್ಷಿ ಹೇಳುವುದು ನನ್ನ ಕೆಲಸ. ಅದಕ್ಕಾಗಿಯೇ ನಾನು ಹುಟ್ಟಿದ್ದು. ಅದಕ್ಕಾಗಿಯೇ ನಾನು ಜಗತ್ತಿಗೆ ಬಂದಿದ್ದು. ಸತ್ಯಪರರೆಲ್ಲರೂ ನನ್ನ ಮಾತಿಗೆ ಕಿವಿಗೊಡುತ್ತಾರೆ,"

ಎಂದು ಹೇಳಿದರು.

³⁸ಆಗ ಪಿಲಾತನು,

"ಸತ್ಯ? ಸತ್ಯವೆಂದರೆ ಏನು?"

ಎಂದು ಪ್ರಶ್ನಿಸಿ ಅಲ್ಲಿ ನಿಲ್ಲದೆ ಹೊರಗೆ ಬಂದನು.

ಯೇಸುವಿಗೆ ಮರಣದಂಡನೆ

(ಮತ್ತಾಯ ೨೭:೧೫-೩೧; ೧೧-೧೪; ಮಾರ್ಕ ೧೫:೬-೨೦; ಲೂಕ ೨೩:೧೩-೨೫)

³⁹ಹೀಗೆ ಪಿಲಾತನು ಹೊರಗಿದ್ದ ಯೆಹೂದ್ಯರ ಬಳಿಗೆ ಬಂದು,

"ನನಗೆ ಆತನಲ್ಲಿ ಯಾವ ಅಪರಾಧವೂ ಕಾಣಿಸುವುದಿಲ್ಲ. ಪಾಸ್ಕಹಬ್ಬದ ಸಂದರ್ಭದಲ್ಲಿ ಒಬ್ಬ ಸೆರೆಯಾಳನ್ನು ಬಿಡುಗಡೆ ಮಾಡುವ ಪದ್ಧತಿಯಿದೆಯಷ್ಟೆ? ಆದ್ದರಿಂದ ನೀವು ಬಯಸಿದರೆ ಯೆಹೂದ್ಯರ ಅರಸನನ್ನು ನಾನು ಬಿಡುಗಡೆ ಮಾಡುತ್ತೇನೆ,"

ಎಂದು ಹೇಳಿದನು.

⁴⁰ಅದಕ್ಕೆ ಅವರು,

"ಬೇಡ, ಇವನು ಬೇಡ. ನಮಗೆ ಬರಬ್ಬನನ್ನು ಬಿಟ್ಟುಕೊಡು,"

ಎಂದು ಬೊಬ್ಬಿಟ್ಟರು. ಬರಬ್ಬನು ಒಬ್ಬ ದರೋಡೆಕೋರನಾಗಿದ್ದನು.

ಅಧ್ಯಾಯಗಳು