ಏಳು ಮಂದಿ ಶಿಷ್ಯರಿಗೆ ದರ್ಶನ
1ಅನಂತರ
ಯೇಸು ತಮ್ಮ ಶಿಷ್ಯರಿಗೆ ಮತ್ತೊಮ್ಮೆ ತಿಬೇರಿಯ ಸರೋವರದ ಬಳಿ ಕಾಣಿಸಿಕೊಂಡರು. ಅದು ಹೀಗೆ ನಡೆಯಿತು:
2ಸಿಮೋನ ಪೇತ್ರನು, ದಿದುಮನೆಂಬ ತೋಮನು, ಗಲಿಲೇಯದ
ಕಾನಾ ಊರಿನ ನಥಾನಿಯೇಲನು, ಜೆಬೆದಾಯನ ಪುತ್ರರು ಮತ್ತು ಯೇಸುವಿನ ಇನ್ನಿಬ್ಬರು ಶಿಷ್ಯರು ಒಟ್ಟಿಗೆ
ಸೇರಿದ್ದರು.
3ಆಗ
ಸಿಮೋನ ಪೇತ್ರನು,
"ನಾನು ಮೀನು ಹಿಡಿಯಲು ಹೋಗುತ್ತೇನೆ,"
ಎಂದನು.
ಮಿಕ್ಕವರು,
"ನಾವೂ ನಿನ್ನೊಡನೆ ಬರುತ್ತೇವೆ,"
ಎಂದರು. ಅವರೆಲ್ಲರೂ ಹೊರಟು ದೋಣಿಯನ್ನು ಹತ್ತಿದರು. ಆ ರಾತ್ರಿಯೆಲ್ಲಾ
ಅವರಿಗೆ ಒಂದೂ ಮೀನು ಸಿಕ್ಕಲಿಲ್ಲ.
4ಬೆಳಗಾಗುವಷ್ಟರಲ್ಲಿ
ಯೇಸು ಸರೋವರದ ದಡದಲ್ಲಿ ನಿಂತಿದ್ದರು. ಆದರೆ ಶಿಷ್ಯರಿಗೆ ಅವರು ಯೇಸುವೆಂದು ತಿಳಿಯಲಿಲ್ಲ.
5ಯೇಸು
ಅವರಿಗೆ,
"ಮಕ್ಕಳೇ, ಊಟಕ್ಕೆ ಏನಾದರೂ ಸಿಕ್ಕಿತೇ?"
ಎಂದು ಕೇಳಿದರು.
ಅವರು,
"ಏನೂ ಇಲ್ಲ,"
ಎಂದರು.
6"ದೋಣಿಯ
ಬಲಗಡೆಗೆ ಬಲೆ ಬೀಸಿರಿ; ಮೀನುಗಳು ಸಿಗುತ್ತವೆ,"
ಎಂದು ಯೇಸು ಹೇಳಿದರು. ಅವರು ಹಾಗೆಯೇ ಮಾಡಿದರು. ಆಗ ಮೀನುಗಳು
ರಾಶಿರಾಶಿಯಾಗಿ ಸಿಕ್ಕಿದವು. ಬಲೆಯನ್ನು ಎಳೆಯಲೂ ಆಗದೇ ಹೋಯಿತು. 7ಆಗ ಯೇಸುವಿನ ಆಪ್ತಶಿಷ್ಯನು
ಪೇತ್ರನಿಗೆ,
"ಅವರೇ ಪ್ರಭು"
ಎಂದನು.
ಪ್ರಭುವೆಂದು ಕೇಳಿದ್ದೇ ತಡ, ಬರಿ ಮೈಯಲ್ಲಿದ್ದ ಪೇತ್ರನು
ಬಟ್ಟೆಯನ್ನು ಹಾಕಿಕೊಂಡು ನೀರಿಗೆ ಧುಮುಕಿದನು. 8ಮಿಕ್ಕ ಶಿಷ್ಯರು ಮೀನು ತುಂಬಿದ್ದ
ಬಲೆಯನ್ನು ಎಳೆಯುತ್ತಾ ಸುಮಾರು ಮುನ್ನೂರು ಅಡಿ ದೂರದಲ್ಲಿದ್ದ ದಡಕ್ಕೆ ದೋಣಿಯಲ್ಲೇ ಬಂದರು. 9ಅವರು ದಡವನ್ನು ಸೇರಿದಾಗ ಅಲ್ಲಿ ಇದ್ದಲಿನ ಬೆಂಕಿ ಮಾಡಲಾಗಿತ್ತು. ಕೆಂಡದ
ಮೇಲೆ ಮೀನುಗಳಿದ್ದವು. ರೊಟ್ಟಿಯೂ ಅಲ್ಲಿತ್ತು.
10ಯೇಸು
ಅವರಿಗೆ,
"ನೀವು ಈಗ ತಾನೇ ಹಿಡಿದ ಮೀನುಗಳಲ್ಲಿ ಕೆಲವನ್ನು ತನ್ನಿ,"
ಎಂದು ಹೇಳಿದರು.
11ಸಿಮೋನ
ಪೇತ್ರನು ದೋಣಿಯನ್ನು ಹತ್ತಿ ಬಲೆಯನ್ನು ದಡಕ್ಕೆ ಎಳೆದು ತಂದನು. ಬಲೆಯ ತುಂಬ ದೊಡ್ಡದೊಡ್ಡ ಮೀನುಗಳು-ಒಟ್ಟಿಗೆ
ನೂರಾ ಐವತ್ತಮೂರು ಇದ್ದವು. ಅಷ್ಟು ಮೀನುಗಳಿದ್ದರೂ ಬಲೆಯು ಹರಿದಿರಲಿಲ್ಲ.
12ಯೇಸು
ಅವರಿಗೆ,
"ಬಂದು ಊಟಮಾಡಿ,"
ಎಂದು ಅವರನ್ನು ಕರೆದರು.
ಅವರು ಪ್ರಭುವೆಂದು ಅರಿತಿದ್ದ ಕಾರಣ ಶಿಷ್ಯರಲ್ಲಿ ಒಬ್ಬನಿಗೂ,
'ನೀವು ಯಾರು?' ಎಂದು ಕೇಳುವಷ್ಟು ಧೈರ್ಯವಾಗಲಿಲ್ಲ. 13ಯೇಸು
ಅವರ ಹತ್ತಿರ ಬಂದು ರೊಟ್ಟಿಗಳನ್ನು ತೆಗೆದು ಕೊಟ್ಟರು; ಹಾಗೆಯೇ ಮೀನುಗಳನ್ನೂ ಕೊಟ್ಟರು.
14ಯೇಸು
ಸತ್ತು ಜೀವಂತರಾಗಿ ಎದ್ದ ಬಳಿಕ ತಮ್ಮ ಶಿಷ್ಯರಿಗೆಕಾಣಿಸಿಕೊಂಡದ್ದು ಇದು ಮೂರನೆಯ ಸಾರಿ.
ಯೇಸು ಮತ್ತು ಪೇತ್ರ
15ಅವರೆಲ್ಲರ
ಊಟವಾದ ಮೇಲೆ ಯೇಸು ಸಿಮೋನ ಪೇತ್ರನನ್ನು ನೋಡಿ,
"ಯೊವಾನ್ನನ ಮಗನಾದ ಸಿಮೋನನೇ, ಇವುಗಳಿಗಿಂತಲೂ ಹೆಚ್ಚಾಗಿ
ನೀನು ನನ್ನನ್ನು ಪ್ರೀತಿಸುತ್ತೀಯಾ?"
ಎಂದು ಕೇಳಿದರು.
ಅದಕ್ಕೆ ಪೇತ್ರನು,
"ಹೌದು ಪ್ರಭೂ, ನಾನು ನಿಮ್ಮನ್ನು ಪ್ರೀತಿಸುತ್ತೇನೆಂದು
ನೀವೇ ಬಲ್ಲಿರಿ,"
ಎಂದನು.
ಯೇಸು ಅವನಿಗೆ,
"ನನ್ನ ಕುರಿಮರಿಗಳನ್ನು ಮೇಯಿಸು,"
ಎಂದರು.
16ಯೇಸು
ಎರಡನೆಯ ಬಾರಿ,
"ಯೊವಾನ್ನನ ಮಗನಾದ ಸಿಮೋನನೇ, ನೀನು ನನ್ನನ್ನು ಪ್ರೀತಿಸುತ್ತೀಯಾ?"
ಎಂದು ಕೇಳಲು,
"ಹೌದು ಪ್ರಭುವೇ, ನಾನು ನಿಮ್ಮನ್ನು ಪ್ರೀತಿಸುತ್ತೇನೆಂದು
ನೀವೇ ಬಲ್ಲಿರಿ,"
ಎಂದು ಮರುನುಡಿದನು.
ಯೇಸು ಅವನಿಗೆ,
"ನನ್ನ ಕುರಿಗಳನ್ನು ಕಾಯಿ,"
ಎಂದರು.
17ಮೂರನೆಯ
ಬಾರಿಯೂ ಯೇಸು,
"ಯೊವಾನ್ನನ ಮಗನಾದ ಸಿಮೋನನೇ, ನೀನು ನನ್ನನ್ನು ಪ್ರೀತಿಸುತ್ತೀಯಾ?"
ಎಂದು ಕೇಳಿದರು.
'ನೀನು ನನ್ನನ್ನು ಪ್ರೀತಿಸುತ್ತೀಯಾ?' ಎಂದು ಯೇಸು ಮೂರನೆಯ
ಬಾರಿ ಕೇಳಿದ್ದನ್ನು ಕಂಡು ಪೇತ್ರನು ನೊಂದುಕೊಂಡನು.
"ಪ್ರಭುವೇ, ನಿಮಗೆ ಎಲ್ಲವೂ ತಿಳಿದಿದೆ. ನಾನು ನಿಮ್ಮನ್ನು
ಪ್ರೀತಿಸುತ್ತೇನೆಂದು ನಿಮಗೆ ತಿಳಿದೇ ಇದೆ,"
ಎಂದು ಹೇಳಿದನು.
ಅದಕ್ಕೆ ಯೇಸು,
"ನನ್ನ ಕುರಿಗಳನ್ನು ಮೇಯಿಸು; 18ನಾನು ನಿನಗೆ ಸತ್ಯವಾಗಿ ಹೇಳುತ್ತೇನೆ ಕೇಳು: ತಾರುಣ್ಯದಲ್ಲಿ ನೀನೇ ನಡುಕಟ್ಟಿಕೊಂಡು
ಇಷ್ಟ ಬಂದ ಕಡೆ ನಡೆದೆ. ಆದರೆ ನೀನು ಕೈಚಾಚುವೆ. ಬೇರೊಬ್ಬನು
ನಿನ್ನ ನಡುಕಟ್ಟಿ ನಿನ್ನನ್ನು ನಡೆಸಿಕೊಂಡು ಹೋಗುವನು,"
ಎಂದು ನುಡಿದರು.
19ಪೇತ್ರನು
ಎಂತಹಾ ಸಾವಿನಿಂದ ದೇವರ ಮಹಿಮೆಯನ್ನು ಬೆಳಗಿಸಲಿದ್ದಾನೆ ಎಂದು ಸೂಚಿಸಿ ಹಾಗೆ ಹೇಳಿದ್ದರು.
ಇದಾದ ಮೇಲೆ ಯೇಸು ಪೇತ್ರನಿಗೆ,
"ನೀನು ನನ್ನನ್ನು ಹಿಂಬಾಲಿಸಿ ಬಾ,"
ಎಂದರು.
ಯೇಸು ಮತ್ತು ಆಪ್ತ ಶಿಷ್ಯ
20ಪೇತ್ರನು
ಹಿಂದಿರುಗಿ ನೋಡಿದಾಗ, ಯೇಸುವಿಗೆ ಆಪ್ತನಾಗಿದ್ದ ಶಿಷ್ಯನು ಬರುತ್ತಿರುವುದನ್ನು ಕಂಡನು. (ಭೋಜನದ ಸಮಯದಲ್ಲಿ
ಯೇಸುವಿನ ಪಕ್ಕದಲ್ಲೇ ಒರಗಿ, 'ಪ್ರಭುವೇ, ನಿಮ್ಮನ್ನು ಹಿಡಿದುಕೊಡುವಂತಹ ದ್ರೋಹಿ ಯಾರು?' ಎಂದು ಕೇಳಿದವನೇ
ಅವನು).
21ಇವನನ್ನು
ಕಂಡು ಪೇತ್ರನು,
"ಪ್ರಭು, ಇವನ ವಿಷಯವೇನು?"
ಎಂದು ಯೇಸುವನ್ನು ಕೇಳಿದನು.
22ಅದಕ್ಕೆ
ಯೇಸು,
"ನಾನು ಬರುವ ತನಕ ಅವನು ಹಾಗೆಯೇ ಇರಬೇಕೆಂಬುದು ನನ್ನ
ಬಯಕೆಯಾದರೆ ಅದರಿಂದ ನಿನಗೇನಾಗಬೇಕು? ನೀನಂತೂ ನನ್ನನ್ನು ಹಿಂಬಾಲಿಸಿ ಬಾ,"
ಎಂದರು.
23ಇದರಿಂದಾಗಿ
ಆ ಶಿಷ್ಯನಿಗೆ ಸಾವಿಲ್ಲವೆಂಬ ವದಂತಿ ಸೋದರರಲ್ಲಿ ಹಬ್ಬಿತು. ಯೇಸು, 'ನಾನು ಬರುವ ತನಕ ಅವನು ಹಾಗೆಯೇ
ಇರಬೇಕೆಂಬುದು ನನ್ನ ಬಯಕೆಯಾದರೆ ಅದರಿಂದ ನಿನಗೇನಾಗಬೇಕು?' ಎಂದು ಹೇಳಿದರೇ ಹೊರತು ಅವನಿಗೆ ಸಾವಿಲ್ಲವೆಂದು
ಹೇಳಲಿಲ್ಲ. 24ಇವುಗಳಿಗೆ ಆ ಶಿಷ್ಯನೇ ಸಾಕ್ಷಿ.
ಇದನ್ನೆಲ್ಲಾ ಬರೆದಿಟ್ಟವನೂ ಅವನೇ. ಅವನ ಸಾಕ್ಷಿ ಸತ್ಯವಾದುದೆಂದು ನಾವು ಬಲ್ಲೆವು.
ಸಮಾಪ್ತಿ
25ಯೇಸು
ಮಾಡಿದವು ಇನ್ನೂ ಎಷ್ಟೋ ಇವೆ. ಅವನ್ನೆಲ್ಲಾ ಒಂದೊಂದಾಗಿ ಬರೆಯಲು ಹೋದರೆ ಬರೆಯಬೇಕಾದ ಗ್ರಂಥಗಳನ್ನು
ಬಹುಶಃ ಲೋಕವೇ ಹಿಡಿಸಲಾರದೆಂದು ನೆನಸುತ್ತೇನೆ.
***
ಅಧ್ಯಾಯಗಳು
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್‌ ಮಾಡಿ