ನವಜನ್ಮದ ಸಮಸ್ಯೆ
1ಅಲ್ಲಿ
ನಿಕೊದೇಮನೆಂಬ ಫರಿಸಾಯನಿದ್ದನು. 2ಅವನು ಯೆಹೂದ್ಯರ ನಾಯಕರಲ್ಲಿ
ಒಬ್ಬನು. ಒಂದು ರಾತ್ರಿ ಅವನು ಯೇಸುವಿನ ಬಳಿ ಬಂದು,
"ಗುರುದೇವಾ, ತಾವು ದೇವರಿಂದ ಬಂದ ಬೋಧಕರೆಂದು ನಾವು
ಬಲ್ಲೆವು.ದೇವರು ತನ್ನೊಡನೆ ಇಲ್ಲದ ಹೊರತು ಯಾರಿಂದಲೂ ತಾವು ಮಾಡುವ ಸೂಚಕಕಾರ್ಯಗಳನ್ನು ಮಾಡಲು ಆಗದು,"
ಎಂದು ಹೇಳಿದನು.
3ಆಗ
ಯೇಸು,
"ನಾನು ನಿಮಗೆ ಸತ್ಯವಾಗಿ ಹೇಳುತ್ತೇನೆ: ಒಬ್ಬನು ಹೊಸದಾಗಿ
ಹುಟ್ಟದಿದ್ದರೆ* ಅವನು ದೇವರ ಸಾಮ್ರಾಜ್ಯವನ್ನು ಸೇರಲಾರ,"
ಎಂದು ಹೇಳಿದರು. 4ಅದಕ್ಕೆ ನಿಕೊದೇಮನು,
"ವಯಸ್ಸಾದ ಒಬ್ಬನು ಹೊಸದಾಗಿ ಹುಟ್ಟುವುದಾದರೂ ಹೇಗೆ?ತಾಯಿಯ
ಗರ್ಭವನ್ನು ಮತ್ತೊಮ್ಮೆ ಹೊಕ್ಕು ಅವನು ಹುಟ್ಟಲು ಸಾಧ್ಯವೇ?"
ಎಂದು ಕೇಳಿದನು.
5ಅದಕ್ಕೆ
ಪ್ರತ್ಯುತ್ತರವಾಗಿ ಯೇಸು,
"ನಾನು ನಿನಗೆ ಸತ್ಯವಾಗಿ ಹೇಳುತ್ತೇನೆ: ನೀರಿನಿಂದಲೂ
ಪವಿತ್ರಾತ್ಮರಿಂದಲೂ ಹುಟ್ಟದ ಹೊರತು ಯಾರೂ ದೇವರ ರಾಜ್ಯವನ್ನು ಪ್ರವೇಶಿಸಲಾರರು. 6ಶರೀರದಿಂದ ಹುಟ್ಟಿದ್ದು ಶರೀರಮಯ, ದೇವರಿಂದ ಹುಟ್ಟಿದ್ದು ದೈವಮಯ.7ನೀವು ಹೊಸಜನ್ಮ ಪಡೆಯಬೇಕೆಂದು ನಾನು ಹೇಳಿದ್ದನ್ನು ಕೇಳಿ ಬೆರಗಾಗಬೇಕಿಲ್ಲ.
8ಗಾಳಿ ತನಗೆ ತೋಚಿದ ಕಡೆಗೆ ಬೀಸುತ್ತದೆ.ಅದರ ಶಬ್ದ
ನಿನಗೆ ಕೇಳಿಸುತ್ತದೆ; ಆದರೆ ಅದು ಎಲ್ಲಿಂದ ಬರುತ್ತದೆ, ಎಲ್ಲಿಗೆ ಹೋಗುತ್ತದೆ ಎಂಬುದು ನಿನಗೆ ತಿಳಿಯದು.ದೇವರ
ಆತ್ಮದಿಂದ ಹುಟ್ಟಿದವನು ಅದರಂತೆಯೇ,"
ಎಂದು ಹೇಳಿದರು.
9ಅದಕ್ಕೆ
ನಿಕೊದೇಮನು,
“ಇದೆಲ್ಲಾ ಹೇಗೆ ಸಾಧ್ಯ?"
ಎಂದು ಕೇಳಿದನು.
10ಆಗ
ಯೇಸು,
"ಇಸ್ರಯೇಲಿನ ಹೆಸರಾಂತ ಬೋಧಕನಾದ ನಿನಗೆ ಇದು ಅರ್ಥವಾಗಲಿಲ್ಲವೆ?11ನಾನು ನಿನಗೆ ಸತ್ಯವಾಗಿ ಹೇಳುತ್ತೇನೆ ಕೇಳು: ನಮಗೆ ತಿಳಿದುದನ್ನು ಕುರಿತು
ನಾವು ಮಾತನಾಡುತ್ತೇವೆ; ನಾವು ಕಂಡಿದ್ದನ್ನು ಕುರಿತು ಸಾಕ್ಷಿ ನೀಡುತ್ತೇವೆ. ಆದರೂ ನಮ್ಮ ಸಾಕ್ಷ್ಯವನ್ನು
ಒಪ್ಪಿಕೊಳ್ಳಲು ನೀವು ಸಿದ್ಧರಿಲ್ಲ. 12ಭೂಲೋಕದ ವಿಷಯವನ್ನು ಕುರಿತು
ನಾನು ಮಾತನಾಡಿದಾಗಲೇ ನಿಮಗೆ ವಿಶ್ವಾಸವಿಲ್ಲವೆಂದ ಮೇಲೆ, ಸ್ವರ್ಗಲೋಕದ ವಿಷಯವನ್ನು ಕುರಿತು ನಾನು
ಮಾತನಾಡದಲ್ಲಿ ನೀವು ವಿಶ್ವಾಸಿಸುವುದುಂಟೆ? 13ಸ್ವರ್ಗಲೋಕದಿಂದಲೇ ಇಳಿದುಬಂದ
ನರಪುತ್ರನ ಹೊರತು ಬೇರೆ ಯಾರೂ ಸ್ವರ್ಗಕ್ಕೆ ಏರಿಹೋದವರಿಲ್ಲ.14ಮೋಶೆಯು ಮರುಭೂಮಿಯಲ್ಲಿ ಸರ್ಪವನ್ನು ಮೇಲಕ್ಕೆ ಎತ್ತಿದನು.15ಅಂತೆಯೇ ನರಪುತ್ರನಲ್ಲಿ ವಿಶ್ವಾಸವಿಟ್ಟವರೆಲ್ಲರೂ ನಿತ್ಯಜೀವವನ್ನು ಪಡೆಯುವಂತೆ
ನರಪುತ್ರನನ್ನು ಸಹ ಮೇಲಕೆತ್ತಬೇಕು.16ದೇವರು ಲೋಕವನ್ನು ಎಷ್ಟೊಂದು
ಪ್ರೀತಿಸಿದರೆಂದರೆ, ತಮ್ಮ ಏಕೈಕ ಪುತ್ರನನ್ನೇ ಧಾರೆಯೆರೆದರು; ಅವರಲ್ಲಿ ವಿಶ್ವಾಸವಿಟ್ಟ ಯಾರೂ ನಾಶವಾಗದೆ
ಎಲ್ಲರೂ ನಿತ್ಯಜೀವವನ್ನು ಪಡೆಯಬೇಕೆಂಬುದೇ ದೇವರ ಉದ್ದೇಶ. 17ದೇವರು ತಮ್ಮ ಪುತ್ರನನ್ನು ಈ ಲೋಕಕ್ಕೆ ಕಳುಹಿಸಿದ್ದು ಲೋಕವನ್ನು ತೀರ್ಪಿಗೆ
ಗುರಿಮಾಡಲೆಂದಲ್ಲ; ಪುತ್ರನ ಮುಖಾಂತರ ಲೋಕವು ಉದ್ಧಾರವಾಗಲೆಂದು. 18ಪುತ್ರನಲ್ಲಿ ವಿಶ್ವಾಸವಿಟ್ಟವನಿಗೆ ತೀರ್ಪಿಲ್ಲ. ಆದರೆ ಆತನಲ್ಲಿ ವಿಶ್ವಾಸವಿಡದವನು
ತೀರ್ಪಿಗೆ ಗುರಿಯಾಗಲಿದ್ದಾನೆ; ಏಕೆಂದರೆ ಅವನಿಗೆ ದೇವರ ಏಕೈಕ ಪುತ್ರನಲ್ಲಿ ವಿಶ್ವಾಸವಿಲ್ಲ. 19ಆ ತೀರ್ಪು ಏನೆಂದರೆ; ಜ್ಯೋತಿಯು ಜಗತ್ತಿಗೆ ಬಂದಿತು: ಆದರೆ ಮಾನವನು ತಮ್ಮ
ದುಷ್ಕೃತ್ಯಗಳಿಂದಾಗಿ ಆ ಜ್ಯೋತಿಗೆ ಬದಲು ಅಂಧಕಾರವನ್ನೇ ಅವಲಂಬಿಸಿದರು. 20ಕೇಡನ್ನು ಮಾಡುವವನಿಗೆ ಬೆಳಕೆಂದರೆ ಆಗದು.ತನ್ನ ದುಷ್ಕೃತ್ಯಗಳು ಬಯಲಾಗಬಾರದೆಂದು
ಅವನು ಬೆಳಕಿನ ಬಳಿಗೆ ಸುಳಿಯುವುದೂ ಇಲ್ಲ. 21ಆದರೆ ಸತ್ಯಸಂಧನು ಬೆಳಕಿನ ಬಳಿಗೆ
ಬರುತ್ತಾನೆ.ತಾನು ಮಾಡುವುದು ದೇವರು ಮೆಚ್ಚುವುದನ್ನೇ ಎಂಬುದನ್ನು ತೋರ್ಪಡಿಸುತ್ತಾನೆ,"
ಎಂದರು.
ಯೇಸು ಮತ್ತು ಯೊವಾನ್ನ
22ಇದಾದ
ಬಳಿಕ ಯೇಸುವು ತಮ್ಮ ಶಿಷ್ಯರೊಡನೆ ಜುದೇಯ ಪ್ರಾಂತ್ಯಕ್ಕೆ ಬಂದು ಅವರೊಡನೆ ಕೆಲಕಾಲ ಅಲ್ಲೇ ಉಳಿದುಕೊಂಡು
ದೀಕ್ಷಾಸ್ನಾನ ಕೊಡತೊಡಗಿದರು. 23ಅತ್ತ ಯೊವಾನ್ನನು ಕೂಡ ಸಾಲಿಮ್‌
ಎಂಬ ಊರಿಗೆ ಹತ್ತಿರವಾಗಿದ್ದ ಐನೋನ್‌ ಎಂಬ ಸ್ಥಳದಲ್ಲಿ ನೀರು ಹೆಚ್ಚಾಗಿದ್ದುದರಿಂದ ಸ್ನಾನದೀಕ್ಷೆ
ಕೊಡುತ್ತಿದ್ದನು. ಜನರು ಬಂದು ಸ್ನಾನದೀಕ್ಷೆಯನ್ನು ಪಡೆಯುತ್ತಿದ್ದರು. 24ಆಗ ಯೊವಾನ್ನನಿನ್ನೂ ಬಂಧಿತನಾಗಿರಲಿಲ್ಲ.
25ಶುದ್ಧಾಚಾರವನ್ನು
ಕುರಿತು ಯೊವಾನ್ನನ ಶಿಷ್ಯರಿಗೂ ಯೆಹೂದ್ಯನೊಬ್ಬನಿಗೂ ವಿವಾದವೆದ್ದಿತು.
26ಅವರು
ಯೊವಾನ್ನನ ಬಳಿಗೆ ಬಂದು,
"ಗುರುವೇ, ಜೋರ್ಡನಿನ ಆಚೆಕಡೆಯಲ್ಲಿ ನಿಮ್ಮೊಡನೆ ಒಬ್ಬನು
ಇದ್ದನಲ್ಲವೆ? ಆತನನ್ನು ಕುರಿತು ನೀವೇ ಸಾಕ್ಷಿ ಹೇಳಲಿಲ್ಲವೆ? ಈಗ ನೋಡಿ, ಆತನೇ ದೀಕ್ಷಾಸ್ನಾನ ಕೊಡುತ್ತಿದ್ದಾನೆ.
ಎಲ್ಲರೂ ಆತನ ಬಳಿಗೆ ಹೋಗುತ್ತಿದ್ದಾರೆ,"
ಎಂದು ದೂರಿತ್ತರು.
27ಅದಕ್ಕೆ
ಯೊವಾನ್ನನು,
"ದೇವರು ದಯಪಾಲಿಸದೆ ಹೋದರೆ ಮಾನವನಿಗೇನೂ ದಕ್ಕದು.
28ನಾನು ಲೋಕೋದ್ಧಾರಕನಲ್ಲ; ಆತನ
ಮುಂದೂತ ಮಾತ್ರ, ಎಂದು ನಾನು ಹೇಳಿದ್ದಕ್ಕೆ ನೀವೇ ಸಾಕ್ಷಿಗಳಾಗಿದ್ದೀರಿ.29ಮದುಮಗಳು ಮದುಮಗನಿಗೆ ಸೇರಿದವಳು. ಆದರೆ ಮದುಮಗನ ಗೆಳೆಯನು ಪಕ್ಕದಲ್ಲಿದ್ದು
ಮದುಮಗನ ಕರೆಗೆ ಕಿವಿಗೊಡುತ್ತಾನೆ; ಆತನ ಸ್ವರ ಕೇಳಿ ಹರ್ಷಿಸುತ್ತಾನೆ.ಇಂಥ ಆನಂದದಿಂದ ನಾನೀಗ ಭರಿತನಾಗಿದ್ದೇನೆ.30ಅವರು ಬೆಳೆಯುತ್ತಿರಬೇಕು, ನಾನು ಅಳಿಯುತ್ತಿರಬೇಕು,"
ಪರದಿಂದ ಬಂದವನು
31"ಮೇಲಿನಿಂದ
ಬಂದವನೇ ಎಲ್ಲರಿಗಿಂತ ಮೇಲಾದವನು.ಆದರೆ ಇಹಲೋಕದಿಂದ ಬಂದವನು ಈ ಲೋಕಕ್ಕೆ ಸೇರಿದವನು; ಅವನು ಲೌಕಿಕವಾದುದನ್ನೇ
ಹೇಳುವವನು.ಆದರೆ ಸ್ವರ್ಗದಿಂದ ಬಂದವನು ಸರ್ವರಿಗೂ ಶ್ರೇಷ್ಟನು.32ಆತನು ತಾನು ಕಂಡಿದ್ದನ್ನೂ ಕೇಳಿದ್ದನ್ನೂ ಕುರಿತೇ ಸಾಕ್ಷಿಹೇಳುತ್ತಾನೆ.
ಆದರೂ ಆತನ ಮಾತನ್ನು ಯಾರೂ ಅಂಗೀಕರಿಸುವುದಿಲ್ಲ. 33ಆತನ
ಮಾತನ್ನು ಅಂಗೀಕರಿಸುವವನು ದೇವರು ಸತ್ಯಸ್ವರೂಪಿ ಎಂದು ಸಾದೃಷ್ಯಪಡಿಸುತ್ತಾನೆ. 34ದೇವರು ಕಳುಹಿಸಿದಾತನುದೇವರ ಮಾತುಗಳನ್ನೇ ಆಡುತ್ತಾನೆ.ಏಕೆಂದರೆ ದೇವರು
ಆತನಿಗೆ ಪವಿತ್ರಾತ್ಮರನ್ನು ಪೂರ್ಣವಾಗಿ ಕೊಟ್ಟಿರುತ್ತಾರೆ, 35ಪಿತಪುತ್ರನನ್ನು ಪ್ರೀತಿಸಿ ಸರ್ವಸ್ವವನ್ನೂ ಆತನ ಕೈಗೆ ಕೊಟ್ಟಿದ್ದಾರೆ.36ಪುತ್ರನಲ್ಲಿ ವಿಶ್ವಾಸವಿಟ್ಟವನು ನಿತ್ಯಜೀವವನ್ನು ಪಡೆದಿರುತ್ತಾನೆ; ಪುತ್ರನಿಗೆ
ಶರಣಾಗದವನು ನಿತ್ಯಜೀವವನ್ನು ಸವಿಯನು.ಅವನು ದೇವರ ಕೋಪಾಗ್ನಿಗೆ ಗುರಿಯಾಗುತ್ತಾನೆ," ಎಂದು ಉತ್ತರಕೊಟ್ಟರು.
* ಮೂಲದಲ್ಲಿ: ಮೇಲಿನಿಂದ ಹುಟ್ಟಿದ ಹೊರತು.ಅಧ್ಯಾಯಗಳು
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್‌ ಮಾಡಿ