ಯೊವಾನ್ನನು ಬರೆದ ಸುಸಂದೇಶ: ಅಧ್ಯಾಯ 4

ಯೇಸು ಮತ್ತು ಸಮಾರಿಯಾದ ಮಹಿಳೆ

¹ಯೊವಾನ್ನನಿಗಿಂತಲೂ ಯೇಸುವೇ ಹೆಚ್ಚು ಮಂದಿ ಜನರನ್ನು ಶಿಷ್ಯರನ್ನಾಗಿಸಿಕೊಳ್ಳುತ್ತಾ, ಅವರಿಗೆ ದೀಕ್ಷಾಸ್ನಾನ ಕೊಡುತ್ತಾ ಇದ್ದಾರೆಂಬ ವಾರ್ತೆಯು ಫರಿಸಾಯರ ಕಿವಿಗೆ ಬಿದ್ದಿತು. ²(ವಾಸ್ತವವಾಗಿ ದೀಕ್ಷಾಸ್ನಾನವನ್ನು ಕೊಡುತ್ತಿದ್ದವರು ಯೇಸುವಿನ ಶಿಷ್ಯರೆ ಹೊರತು ಯೇಸುವಲ್ಲ). ³ಯೇಸು ಇದನ್ನು ತಿಳಿದು ಜುದೇಯವನ್ನು ಬಿಟ್ಟು ಮತ್ತೆ ಗಲಿಲೇಯಕ್ಕೆ ಹೊರಟರು. ⁴ದಾರಿಯಲ್ಲಿ ಸಮಾರಿಯ ಪ್ರಾಂತವನ್ನು ಹಾದುಹೋಗಬೇಕಾಗಿತ್ತು.

⁵ಯೇಸು ಹೋಗುತ್ತಿರುವಾಗ ಸಮಾರಿಯದ ಸಿಖಾರೆಂಬ ಊರನ್ನು ತಲುಪಿದರು. ಈ ಊರಿನ ಪಕ್ಕದಲ್ಲೇ ಯಕೋಬನು ತನ್ನ ಮಗನಾದ ಜೋಸೆಫನಿಗೆ ಕೊಟ್ಟ ಭೂಮಿ ಇದೆ. ⁶ಅಲ್ಲೇ ಯಕೋಬನ ಬಾವಿಯೂ ಇದೆ. ಪಯಣದಿಂದ ಬಳಲಿದ್ದ ಯೇಸು ಬಾವಿಯ ಬಳಿ ಕುಳಿತುಕೊಂಡರು. ಆಗ ಸುಮಾರು ಮಧ್ಯಾಹ್ನದ ಹೊತ್ತು. ⁷ಒಬ್ಬ ಸಮಾರಿಯದ ಮಹಿಳೆ ನೀರು ಸೇದಲು ಅಲ್ಲಿಗೆ ಬಂದಳು.

ಆಗ ಯೇಸು,

"ಕುಡಿಯಲು ಕೊಂಚ ನೀರು ಕೊಡು,"

ಎಂದು ಕೇಳಿದರು.

⁸ಶಿಷ್ಯರು ಊಟಕ್ಕೇನಾದರೂ ಕೊಂಡುತರಬೇಕೆಂದು ಊರಿನೊಳಕ್ಕೆ ಹೋಗಿದ್ದರು.

⁹ಅದಕ್ಕೆ ಆಕೆ,

"ನೀವು ಯೆಹೂದ್ಯರು, ನಾನು ಸಮಾರಿಯದವಳು. ಹೀಗಿರುವಾಗ ನೀವು ನನ್ನಿಂದ ನೀರನ್ನು ಕೇಳಬಹುದೇ?"

ಎಂದಳು. (ಯೆಹೂದ್ಯರಿಗೂ ಸಮಾರಿಯದವರಿಗೂ ಕೊಡುಕೊಳ್ಳುವಿಕೆ ಇರಲಿಲ್ಲ).

¹⁰ಆಗ ಯೇಸು,

"ದೇವರು ಕೊಡುವ ವರದಾನವನ್ನು ಮತ್ತು ಕುಡಿಯಲು ನಿನ್ನಿಂದ ನೀರನ್ನು ಕೇಳುತ್ತಿರುವ ವ್ಯಕ್ತಿಯನ್ನು ನೀನು ಅರಿತಿದ್ದರೆ ಆಗ ನೀನೇ ಅವರಲ್ಲಿ ಬೇಡುತ್ತಿದ್ದೆ, ಅವರು ನಿನಗೆ ಜೀವಜಲವನ್ನು ಕೊಡುತ್ತಿದ್ದರು,"

ಎಂದು ಉತ್ತರಕೊಟ್ಟರು.

¹¹ಅದಕ್ಕೆ ಆಕೆ,

"ನೀರು ಸೇದುವುದಕ್ಕೆ ನಿಮ್ಮಲ್ಲಿ ಏನೂ ಇಲ್ಲ, ಬಾವಿಯು ಆಳವಾಗಿದೆ; ಹೀಗಿರುವಾಗ ನಿಮಗೆ ಜೀವಜಲ ಎಲ್ಲಿಂದ ಸಿಕ್ಕೀತು? ¹²ನಮಗೆ ಈ ಬಾವಿಯನ್ನು ಕೊಟ್ಟವನು ನಮ್ಮ ಪಿತಾಮಹನಾದ ಯಕೋಬನು. ಆತನು, ಆತನ ಮಕ್ಕಳು ಮತ್ತು ದನಕರುಗಳು ಇದೇ ಬಾವಿಯ ನೀರನ್ನು ಕುಡಿದರು. ಅಂಥಾ ಪಿತಾಮಹನಿಗಿಂತ ನೀವು ದೊಡ್ಡವರೇ?"

ಎಂದಳು.

¹³ಆಗ ಯೇಸು,

"ಈ ನೀರನ್ನು ಕುಡಿಯುವ ಎಲ್ಲರಿಗೂ ಮತ್ತೆ ದಾಹವಾಗುತ್ತದೆ. ¹⁴ಆದರೆ ನಾನು ಕೊಡುವ ನೀರನ್ನು ಕುಡಿದವನಿಗೆ ಎಂದಿಗೂ ದಾಹವಾಗದು; ಆ ನೀರು ಅವನಲ್ಲಿ ಉಕ್ಕಿ ಹರಿಯುವ ಬುಗ್ಗೆಯಾಗಿ, ನಿತ್ಯಜೀವವನ್ನು ತರುತ್ತದೆ,"

ಎಂದು ಉತ್ತರಕೊಟ್ಟರು.

¹⁵ಅದಕ್ಕೆ ಆಕೆ,

" ಸ್ವಾಮಿ, ಅಂಥ ನೀರನ್ನು ಕೊಡಿ, ಇನ್ನು ಮುಂದೆ ನನಗೆ ದಾಹವಾಗದಿರಲಿ. ನೀರು ಸೇದಲು ಇಷ್ಟು ದೂರ ಬರುವುದು ತಪ್ಪಲಿ,"

ಎಂದಳು.

¹⁶ಅದಕ್ಕೆ ಯೇಸು,

"ಹೋಗಿ ನಿನ್ನ ಗಂಡನನ್ನು ಕರೆದುಕೊಂಡು ಬಾ,"

ಎಂದು ಹೇಳಿದರು.

¹⁷ಆಕೆ,

"ನನಗೆ ಗಂಡನಿಲ್ಲ,"

ಎಂದಳು.

¹⁸"ಗಂಡನಿಲ್ಲವೆಂದು ಸರಿಯಾಗಿ ಹೇಳಿದೆ. ನಿನಗೆ ಐದು ಜನ ಗಂಡಂದಿರು ಇದ್ದರು. ಈಗ ನಿನ್ನೊಡನೆ ಇರುವವನು ನಿನ್ನ ಗಂಡನಲ್ಲ, ನೀನು ಹೇಳಿದ್ದು ಸರಿ,"

ಎಂದರು ಯೇಸು. ¹⁹ಅದಕ್ಕೆ ಆ ಮಹಿಳೆ,

"ಸ್ವಾಮಿ, ತಾವು ಪ್ರವಾದಿ ಎಂಬುದು ನನಗೀಗ ತಿಳಿಯಿತು. ²⁰ನಮ್ಮ ಪೂರ್ವಜರು ಈ ಬೆಟ್ಟದ ಮೇಲೆ ದೇವರನ್ನು ಆರಾಧಿಸುತ್ತಿದ್ದರು. ಆದರೆ. ಆರಾಧಿಸತಕ್ಕ ಕ್ಷೇತ್ರ ಇರುವುದು ಜೆರುಸಲೇಮಿನಲ್ಲೇ ಎಂದು ಯೆಹೂದ್ಯರಾದ ನೀವು ಹೇಳುತ್ತೀರಲ್ಲಾ,"

ಎಂದಳು.

²¹ಆಗ ಯೇಸು,

"ತಾಯಿ, ನಾನು ಹೇಳುವುದನ್ನು ಕೇಳು. ಪಿತನ ಆರಾಧನೆಗೆ ಈ ಬೆಟ್ಟಕ್ಕೂ ಬರಬೇಕಾಗಿಲ್ಲ; ಜೆರುಸಲೇಮಿಗೂ ಹೋಗಬೇಕಾಗಿಲ್ಲ. ಅಂಥ ಕಾಲವು ಬರುವುದು. ²²ನೀವು ಆರಾಧಿಸುತ್ತಿರುವುದು ಯಾರನ್ನೆಂದು ನಿಮಗೇ ತಿಳಿಯದು. ನಾವು ಆರಾಧಿಸುತ್ತಿರುವುದು ಯಾರನ್ನೆಂದು ನಮಗೆ ತಿಳಿದಿದೆ. ಏಕೆಂದರೆ ಲೋಕೋದ್ಧಾರಕ ಬರುವುದು ಯೆಹೂದ್ಯರಿಂದಲೇ. ²³ಆ ಕಾಲವು ಬರುವುದು; ಅದು ಈಗಲೇ ಬಂದಿದೆ. ಇನ್ನು ಮೇಲೆ ನಿಜವಾದ ಆರಾಧಕರು ಪಿತನನ್ನು ಆತ್ಮದಿಂದಲೂ ಸತ್ಯದಿಂದಲೂ ಆರಾಧಿಸುವರು. ಅಂಥವರೇ ತಮ್ಮನ್ನು ಆರಾಧಿಸಬೇಕೆಂದು ಪಿತ ಆಶಿಸುತ್ತಾರೆ. ²⁴ದೇವರು ಆತ್ಮಸ್ವರೂಪಿ. ಅವರನ್ನು ಆತ್ಮದಿಂದಲೂ ಸತ್ಯದಿಂದಲೂ ಆರಾಧಿಸತಕ್ಕದ್ದು,"

ಎಂದು ಹೇಳಿದರು.

²⁵ಆಕೆ,

"ಅಭಿಷಿಕ್ತನಾದ ಲೋಕೋದ್ಧಾರಕ ಬರುವನೆಂದು ನಾನು ಬಲ್ಲೆ. ಆತನು ಬಂದಾಗ ಎಲ್ಲವನ್ನೂ ತಿಳಿಸುವನು,"

ಎಂದು ಹೇಳಿದಳು.

²⁶ಆಗ ಯೇಸು,

"ನಿನ್ನೊಡನೆ ಮಾತನಾಡುತ್ತಿರುವ ನಾನೇ ಆತನು,"

ಎಂದು ನುಡಿದರು.

²⁷ಅಷ್ಟರಲ್ಲಿ ಹಿಂತಿರುಗಿ ಬಂದ ಶಿಷ್ಯರು ಯೇಸು ಆ ಮಹಿಳೆಯೊಡನೆ ಮಾತನಾಡುತ್ತಿರುವುದನ್ನು ಕಂಡು ಆಶ್ಚರ್ಯಪಟ್ಟರು. ಆದರೆ,

"ಏನು ಬೇಕು?"

ಎಂದು ಆಕೆಯನ್ನಾಗಲಿ,

"ಆಕೆಯೊಡನೆ ಏಕೆ ಮಾತನಾಡುತ್ತಿದ್ದೀರಿ?"

ಎಂದು ಯೇಸುವನ್ನಾಗಲಿ ಅವರು ಕೇಳಲಿಲ್ಲ. ²⁸ಆ ಮಹಿಳೆ ತನ್ನ ಕೊಡವನ್ನು ಅಲ್ಲಿಯೇ ಬಿಟ್ಟು ಊರಿಗೆ ನಡೆದಳು.

²⁹"ನಾನು ಮಾಡಿದ ಕೃತ್ಯಗಳನ್ನೆಲ್ಲಾ ಕಂಡಂತೆ ತಿಳಿಸಿದ ಒಬ್ಬ ವ್ಯಕ್ತಿ ಅಲ್ಲಿದ್ದಾರೆ. ಬಂದು ನೋಡಿರಿ. ಅವರೇ ಅಭಿಷಿಕ್ತ ಲೋಕೋದ್ಧಾರಕ ಏಕಾಗಿರಬಾರದು?"

ಎಂದು ಊರಿನ ಜನರನ್ನು ಕರೆದಳು. ³⁰ಅವರು ಯೇಸುವಿನ ಬಳಿಗೆ ಬಂದರು.

³¹ಈ ಮಧ್ಯೆ ಶಿಷ್ಯರು,

"ಗುರುದೇವಾ, ಊಟಮಾಡಿ,"

ಎಂದು ಯೇಸುವನ್ನು ಒತ್ತಾಯ ಮಾಡಿದರು.

³²ಆಗ ಯೇಸು,

"ನಿಮಗೆ ತಿಳಿಯದಂತಹ ಆಹಾರ ನನ್ನಲ್ಲಿದೆ,"

ಎಂದರು.

³³ಶಿಷ್ಯರು,

"ಯಾರಾದರೂ ಅವರಿಗೆ ತಿನ್ನಲು ತಂದುಕೊಟ್ಟಿರಬಹುದೆ?"

ಎಂದು ಮಾತನಾಡಿಕೊಂಡರು.

³⁴ಯೇಸು ಅವರಿಗೆ,

"ನನ್ನನ್ನು ಕಳುಹಿಸಿದಾತನ ಚಿತ್ತವನ್ನು ನೆರವೇರಿಸುವುದೇ ನನ್ನ ಆಹಾರ. ಆತನು ಕೊಟ್ಟ ಕಾರ್ಯಗಳನ್ನು ಪೂರೈಸುವುದೇ ನನ್ನ ತಿಂಡಿತೀರ್ಥ. ³⁵ಇನ್ನು ನಾಲ್ಕು ತಿಂಗಳಾದ ಮೇಲೆ ಸುಗ್ಗಿ ಬರುತ್ತದೆ ಎಂದು ನೀವು ಹೇಳುವುದಿಲ್ಲವೆ? ಇದೋ, ಕಣ್ಣು ಹಾಯಿಸಿ ನೋಡಿ; ಬಲಿತು ಕೊಯ್ಲಿಗೆ ಬಂದಿರುವ ಹೊಲಗಳನ್ನು ನೋಡಿ. ³⁶ಕೊಯ್ದವನು ಈಗಾಗಲೇ ಕೂಲಿಯನ್ನು ಪಡೆಯುತ್ತಾನೆ. ಅವನು ನಿತ್ಯಜೀವಕ್ಕೆ ಫಲವನ್ನು ಕೂಡಿಸಿಡುತ್ತಾನೆ. ಹೀಗೆ ಬಿತ್ತುವವನೂ ಕೊಯ್ಯುವವನೂ ಒಟ್ಟಿಗೆ ಸಂತೋಷಪಡುತ್ತಾರೆ. ³⁷"ಬಿತ್ತುವವನೊಬ್ಬ, ಕೊಯ್ಯುವವನೊಬ್ಬ ಎಂಬ ನಾಣ್ಣುಡಿ ನಿಜವಾದುದು. ³⁸ನೀವು ದುಡಿಯುದ ಎಡೆಯಲ್ಲಿ ಕೊಯ್ಲು ಮಾಡಲು ನಾನು ನಿಮ್ಮನ್ನು ಕಳುಹಿಸಿದ್ದೇನೆ. ದುಡಿದವರು ಬೇರೆ. ಅವರ ದುಡಿಮೆಯ ಫಲ ಬರುವುದು ನಿಮ್ಮ ಪಾಲಿಗೆ,"

ಎಂದು ಹೇಳಿದರು.

³⁹'ನಾನು ಮಾಡಿದ ಕೃತ್ಯಗಳನ್ನೆಲ್ಲಾ ಕಂಡಂತೆ ಹೇಳಿದ ವ್ಯಕ್ತಿ' ಎಂದು ಸಾರಿದ ಮಹಿಳೆಯ ಮಾತಿನಿಂದ ಸಮಾರಿಯ ಊರಿನ ಹಲವು ಮಂದಿಗೆ ಯೇಸುವಿನಲ್ಲಿ ನಂಬಿಕೆ ಹುಟ್ಟಿತು. ⁴⁰ಎಂದೇ ಆ ಊರಿನ ಜನರು ಯೇಸುವಿನ ಬಳಿಗೆ ಬಂದು ತಮ್ಮಲ್ಲಿಯೇ ತಂಗಬೇಕೆಂದು ಬೇಡಿಕೊಂಡರು. ಅಂತೆಯೇ ಯೇಸು, ಅಲ್ಲಿ ಎರಡು ದಿನ ಉಳಿದರು. ⁴¹ಇನ್ನೂ ಅನೇಕರಿಗೆ ಯೇಸುವಿನ ಬೋಧನೆಯನ್ನು ಅವರ ಬಾಯಿಯಿಂದಲೇ ಕೇಳಿ ಅವರಲ್ಲಿ ನಂಬಿಕೆ ಮೂಡಿತು. ⁴²ಆಗ ಅವರು ಆ ಮಹಿಳೆಗೆ, "ನೀನು ಹೇಳಿದುದರಿಂದ ಮಾತ್ರವೇ ಈಗ ನಾವು ನಂಬುತ್ತಿಲ್ಲ, ನಾವು ಕಿವಿಯಾರೆ ಕೇಳಿ ನಂಬಿದ್ದೇವೆ; ಲೋಕೋದ್ಧಾರಕ ಇವರೇ ಎಂದು ನಮಗೀಗ ತಿಳಿಯಿತು," ಎಂದರು.

ಅಧಿಕಾರಿಯ ಮಗನಿಗೆ ಆರೋಗ್ಯದಾನ

⁴³ಎರಡು ದಿನಗಳಾದ ಬಳಿಕ ಯೇಸುವು ಅಲ್ಲಿಂದ ಗಲಿಲೇಯಕ್ಕೆ ಹೊರಟರು. ⁴⁴ಪ್ರವಾದಿಗಳಿಗೆ ಸ್ವಗ್ರಾಮದಲ್ಲಿ ಮರ್ಯಾದೆ ಇಲ್ಲವೆಂದು ಅವರೇ ಸಾರಿದ್ದರು. ⁴⁵ಗಲಿಲೇಯವನ್ನು ತಲುಪಿದೊಡನೆ ಜನರು ಅವರನ್ನು ಆದರದಿಂದ ಬರಮಾಡಿಕೊಂಡರು. ಏಕೆಂದರೆ, ಹಬ್ಬದ ಸಮಯದಲ್ಲಿ ಆ ಜನರು ಜೆರುಸಲೇಮಿಗೆ ಹೋಗಿದ್ದಾಗ ಅಲ್ಲಿ ಯೇಸು ಮಾಡಿದ್ದನ್ನೆಲ್ಲಾ ಅವರು ನೋಡಿದ್ದರು.

⁴⁶ಯೇಸು ಗಲಿಲೇಯದ ಕಾನಾ ಊರಿಗೆ ಮರಳಿ ಬಂದರು. ಅವರು ಹಿಂದೆ ನೀರನ್ನು ದ್ರಾಕ್ಷಾರಸವನ್ನಾಗಿ ಮಾಡಿದ್ದು ಅಲ್ಲಿಯೇ. ಕಫರ್ನೌಮಿನಲ್ಲಿ ರಾಜಸೇವೆಯಲ್ಲಿದ್ದ ಒಬ್ಬ ಅಧಿಕಾರಿಯ ಮಗನಿಗೆ ಕಾಯಿಲೆಯಾಗಿತ್ತು. ⁴⁷ಯೇಸು ಜುದೇಯದಿಂದ ಗಲಿಲೇಯಕ್ಕೆ ಬಂದಿರುವುದನ್ನು ಕೇಳಿದ ಆ ಅಧಿಕಾರಿ ಅವರ ಬಳಿಗೆ ಬಂದು, ಸಾವಿನ ದವಡೆಯಲ್ಲಿರುವ ತನ್ನ ಮಗನನ್ನು ಬದುಕಿಸಬೇಕೆಂದು ಬೇಡಿಕೊಂಡನು. ⁴⁸ಯೇಸು ಅವನಿಗೆ,

"ಸೂಚಕಕಾರ್ಯಗಳನ್ನೂ ಅದ್ಭುತಗಳನ್ನೂ ಕಂಡ ಹೊರತು ನೀವು ನಂಬುವುದಿಲ್ಲವಲ್ಲಾ,"

ಎಂದರು.

⁴⁹ಆದರೂ ಆ ಅಧಿಕಾರಿ,

"ನನ್ನ ಮಗನು ಪ್ರಾಣಬಿಡುವ ಮೊದಲೇ ಬನ್ನಿ ಸ್ವಾಮಿ,"

ಎಂದು ಅಂಗಲಾಚಿದನು.

⁵⁰ಆಗ ಯೇಸು,

"ಹೋಗು, ನಿನ್ನ ಮಗನು ಬದುಕುತ್ತಾನೆ,"

ಎಂದು ಹೇಳಿದರು. ಆ ಅಧಿಕಾರಿಯು ಯೇಸುವಿನ ಮಾತನ್ನು ನಂಬಿ ಹೊರಟನು. ⁵¹ಅವನು ಅರ್ಧದಾರಿಯಲ್ಲಿ ಇದ್ದಾಗಲೇ ಆಳುಗಳು ಅವನಿಗೆ ಎದುರಾಗಿ ಬಂದು,

"ನಿಮ್ಮ ಮಗನು ಬದುಕಿಕೊಂಡನು,"

ಎಂದು ತಿಳಿಸಿದರು. ⁵²ಎಷ್ಟು ಹೊತ್ತಿಗೆ ತನ್ನ ಮಗನು ಚೇತರಿಸಿಕೊಂಡನೆಂದು ಅಧಿಕಾರಿಯು ವಿಚಾರಿಸಿದಾಗ,

"ನಿನ್ನೆ ಮಧ್ಯಾಹ್ನ ಒಂದು ಗಂಟೆಗೆ ಅವನ ಜ್ವರ ಬಿಟ್ಟಿತು,"

ಎಂದು ಆಳುಗಳು ಉತ್ತರಕೊಟ್ಟರು.