ಐದಾರು ಸಾವಿರ ಮಂದಿಗೆ ಅದ್ಭುತ ಆಹಾರ
(ಮತ್ತಾಯ
೧೪:೧೩-೨೧; ಮಾರ್ಕ ೬:೩೦-೪೪; ಲೂಕ ೯:೧೦-೧೭)
1ಯೇಸು
ಗಲಿಲೇಯ ಸರೋವರವನ್ನು ದಾಟಿ, ಆಚೆಯ ದಡಕ್ಕೆ ಹೋದರು. ಅದಕ್ಕೆ ತಿಬೇರಿಯ ಸರೋವರವೆಂದು ಹೆಸರು. 2ಜನರ ದೊಡ್ಡ ಗುಂಪೊಂದು ಅವರನ್ನು ಹಿಂಬಾಲಿಸಿತು. ಏಕೆಂದರೆ, ಯೇಸು ಸೂಚಕಕಾರ್ಯಗಳನ್ನು
ಮಾಡುತ್ತಾ ರೋಗಪೀಡಿತರನ್ನು ಗುಣಪಡಿಸುತ್ತಾ ಇದ್ದುದನ್ನು ಆ ಜನರು ಕಂಡಿದ್ದರು. 3ಯೇಸು ಬೆಟ್ಟವನ್ನು ಹತ್ತಿ ತಮ್ಮ ಶಿಷ್ಯರ ಸಂಗಡ ಕುಳಿತುಕೊಂಡರು. 4ಯೆಹೂದ್ಯರ ಪಾಸ್ಕಹಬ್ಬವು ಹತ್ತಿರವಾಗಿತ್ತು. 5ಯೇಸು ಕಣ್ಣು ಹಾಯಿಸಿ ನೋಡಿದಾಗ ಆ ದೊಡ್ಡಗುಂಪು ತಮ್ಮ ಕಡೆಗೆ ಬರುವುದನ್ನು ಕಂಡರು.
"ಈ ಜನರ ಊಟಕ್ಕೆ ನಾವು ರೊಟ್ಟಿಯನ್ನು ಎಲ್ಲಿಂದ ಕೊಂಡುಕೊಳ್ಲುವುದು?"
ಎಂದು ಯೇಸು ಫಿಲಿಪ್ಪನನ್ನು ಕೇಳಿದರು. 6ಫಿಲಿಪ್ಪನನ್ನು ಪರೀಕ್ಷಿಸುವ ಸಲುವಾಗಿ ಅವರು ಹಾಗೆ ಕೇಳಿದ್ದರು. ಏಕೆಂದರೆ
ತಾವು ಮಾಡಲಿರುವುದು ಅವರಿಗೆ ತಿಳಿದಿತ್ತು. 7ಅದಕ್ಕೆ ಫಿಲಿಪ್ಪನು,
"ಇನ್ನೂರು ದಿನಾರಿ ನಾಣ್ಯಗಳನ್ನು ಕೊಟ್ಟು ರೊಟ್ಟಿಯನ್ನು
ತಂದರೂ ಆಳಿಗೊಂದು ತುಂಡೂ ಬಾರದು,"
ಎಂದನು.
8ಆಗ
ಶಿಷ್ಯರಲ್ಲಿ ಒಬ್ಬನು,
"ಇಲ್ಲಿ ಒಬ್ಬ ಹುಡುಗನ ಬಳಿ ಜವೆಗೋದಿಯ ಐದು ರೊಟ್ಟಿಗಳೂ
ಎರಡು ಮೀನುಗಳೂ ಇವೆ. 9ಆದರೆ ಜನಸಮೂಹಕ್ಕೆ ಇದೆಲ್ಲಿ
ಸಾಕಾಗುತ್ತದೆ,"
ಎಂದನು.
10ಯೇಸು,
"ಜನರನ್ನು ಊಟಕ್ಕೆ ಕೂರಿಸಿರಿ,"
ಎಂದರು. ಅಲ್ಲಿ ಹುಲುಸಾಗಿದ್ದ ಹುಲ್ಲಿನ ಮೇಲೆ ಜನರು ಕುಳಿತುಕೊಂಡರು.
ಗಂಡಸರ ಸಂಖ್ಯೆಯೇ ಐದು ಸಾವಿರದಷ್ಟಿತ್ತು. 11ಯೇಸು ರೊಟ್ಟಿಗಳನ್ನು ತೆಗೆದುಕೊಂಡು
ದೇವರಿಗೆ ಸ್ತೋತ್ರವನ್ನು ಸಲ್ಲಿಸಿ, ಕುಳಿತಿದ್ದ ಜನರಿಗೆ ಅವುಗಳನ್ನು ಹಂಚಿದರು. ಹಾಗೆಯೇ ಮೀನುಗಳನ್ನೂ
ಹಂಚಿದರು. ಎಲ್ಲರೂ ತಮಗೆ ಬೇಕಾದಷ್ಟು ತಿಂದರು. 12ಅವರೆಲ್ಲರೂ ತಿಂದು ತೃಪ್ತರಾದ
ಮೇಲೆ ಯೇಸು,
"ತಿಂದುಳಿದ ತುಂಡುಗಳನ್ನು ಒಟ್ಟುಗೂಡಿಸಿ; ಒಂದು ತುಂಡೂ
ಹಾಳಾಗಬಾರದು,"
ಎಂದು ತಮ್ಮ ಶಿಷ್ಯರಿಗೆ ಹೇಳಿದರು. 13ತಿಂದುಳಿದ ಆ ಐದು ರೊಟ್ಟಿಗಳ ತುಂಡುಗಳನ್ನು ಒಟ್ಟುಗೂಡಿಸಲು ಅವು ಹನ್ನೆರಡು
ಬುಟ್ಟಿಗಳ ತುಂಬಾ ಆದವು.
14ಯೇಸು
ಮಾಡಿದ ಈ ಸೂಚಕಕಾರ್ಯಗಳನ್ನು ಕಂಡ ಜನರು,
"ಈ ಲೋಕಕ್ಕೆ ಬರಬೇಕಾಗಿದ್ದ ಪ್ರವಾದಿ ನಿಜವಾಗಿಯೂ
ಇವರೇ,"
ಎಂದು ಹೇಳತೊಡಗಿದ್ದರು. 15ಅವರೆಲ್ಲರೂ ಬಂದು ತಮ್ಮನ್ನು ಹಿಡಿದು ಅರಸನನ್ನಾಗಿ ಮಾಡುವ ಯೋಚನೆಯಲ್ಲಿದ್ದಾರೆ
ಎಂಬುದನ್ನು ಅರಿತ ಯೇಸು ತಾವೊಬ್ಬರೇ ಬೆಟ್ಟದ ಕಡೆಗೆ ಹೊರಟುಬಿಟ್ಟರು.
ನೀರಿನ ಮೇಲಿನ ನಡಿಗೆ
(ಮತ್ತಾಯ
೧೪:೨೨-೩೩; ಮಾರ್ಕ ೬:೪೫-೫೨)
16ಸಾಯಂಕಾಲವಾದ
ಮೇಲೆ ಯೇಸುವಿನ ಶಿಷ್ಯರು ಸರೋವರಕ್ಕೆ ಹೋಗಿ 17ದೋಣಿಯನ್ನು ಹತ್ತಿ ಕಫರ್ನೌಮಿನ
ಕಡೆಗೆ ಸಾಗಿದರು. ಆಗಲೇ ಕತ್ತಲು ಕವಿದಿತ್ತು. ಯೇಸು ಅವರ ಬಳಿಗೆ ಇನ್ನೂ ಬಂದಿರಲಿಲ್ಲ. 18ಅಷ್ಟರಲ್ಲಿ ರಭಸವಾದ ಗಾಳಿ ಬೀಸತೊಡಗಿತು. ಸರೋವರವು ಅಲ್ಲೋಲಕಲ್ಲೋಲವಾಯಿತು.
19ಐದಾರು ಕಿಲೋಮೀಟರಿನಷ್ಟು ಹುಟ್ಟು
ಹಾಕಿರಬೇಕು. ಆಗ ಯೇಸು ನೀರಿನ ಮೇಲೆ ನಡೆಯುತ್ತಾ ದೋಣಿಯನ್ನು ಸಮೀಪಿಸುತ್ತಿರುವುದು ಶಿಷ್ಯರಿಗೆ ಕಾಣಿಸಿತು.
ಅದನ್ನು ನೋಡಿ ಅವರು ಹೆದರಿದರು.
20ಆಗ
ಯೇಸು,
"ನಾನೇ ಇನ್ಯಾರೂ ಅಲ್ಲ; ಅಂಜಬೇಡಿ,"
ಎಂದು ಹೇಳಿದರು. 21ಶಿಷ್ಯರು ಅವರನ್ನು ದೋಣಿಯೊಳಕ್ಕೆ ಬರಮಾಡಿಕೊಳ್ಳುವುದರಲ್ಲಿದ್ದರು. ಅಷ್ಟರಲ್ಲಿ
ದೋಣಿಯು ಸೇರಬೇಕಾಗಿದ್ದ ದಡವನ್ನು ತಲುಪಿಯಾಗಿತ್ತು.
ಯೇಸುವನ್ನು ಅರಸಿದ ಜನ
22ನೆರೆದಿದ್ದ
ಜನರು ಮಾರನೆಯ ದಿನವೂ ಸರೋವರದ ಆಚೆಕಡೆಯೇ ಉಳಿದಿದ್ದರು. ಹಿಂದಿನ ದಿನ ಅಲ್ಲಿ ಒಂದೇ ಒಂದು ದೋಣಿ ಇದ್ದುದನ್ನು
ಅವರು ನೋಡಿದ್ದರು. ಯೇಸುವು ಶಿಷ್ಯರೊಡನೆ ದೋಣಿಯನ್ನು ಹತ್ತಲಿಲ್ಲವಾದುದರಿಂದ ಶಿಷ್ಯರು ಮಾತ್ರ ಹೊರಟುಹೋಗಿದ್ದಾರೆಂದು
ಅವರು ತಿಳಿದಿದ್ದರು. 23ತಿಬೇರಿಯದಿಂದ ಹೊರಟಿದ್ದ ದೋಣಿಗಳು
ಅಷ್ಟು ಹೊತ್ತಿಗೆ ಅಲ್ಲಿಗೆ ಬಂದು ಸೇರಿದವು. ಪ್ರಭುವು ದೇವರಿಗೆ ಕೃತಜ್ಞತೆಯನ್ನು ಸಲ್ಲಿಸಿ, ಜನರಿಗೆ
ರೊಟ್ಟಿಯನ್ನು ಬಡಿಸಿದ್ದ ಸ್ಥಳವು ಅಲ್ಲೇ ಪಕ್ಕದಲ್ಲಿತ್ತು. 24ಯೇಸುವಾಗಲಿ ಅವರ ಶಿಷ್ಯರಾಗಲಿ ಇಲ್ಲದ್ದನ್ನು ನೋಡಿ ಜನರು ಆ ದೋಣಿಗಳನ್ನು
ಹತ್ತಿ ಯೇಸುವನ್ನು ಹುಡುಕುತ್ತಾ ಕಫರ್ನೌಮಿಗೆ ಬಂದರು.
ಯೇಸುವೇ ಜೀವದಾಯಕ ರೊಟ್ಟಿ
25ಜನರು
ಯೇಸುವನ್ನು ಸರೋವರದ ಆಚೆ ದಡದಲ್ಲಿ ಕಂಡೊಡನೆ,
"ಗುರುದೇವಾ, ತಾವಿಲ್ಲಿಗೆ ಬಂದುದು ಯಾವಾಗ?"
ಎಂದು ಕೇಳಿದರು.
26ಯೇಸು
ಅವರಿಗೆ,
"ನಾನು ನಿಮಗೆ ಸತ್ಯವಾಗಿ ಹೇಳುತ್ತೇನೆ: ನೀವು ನನ್ನನ್ನು
ಹುಡುಕಿ ಬಂದದ್ದು ಸೂಚಕಕಾರ್ಯಗಳನ್ನು ನೋಡಿ ಅರ್ಥಮಾಡಿಕೊಂಡಿದ್ದರಿಂದ ಅಲ್ಲ, ಹೊಟ್ಟೆ ತುಂಬುವಷ್ಟು
ರೊಟ್ಟಿ ಸಿಕ್ಕಿದ್ದರಿಂದ. 27ಅಳಿದುಹೋಗುವ ಆಹಾರಕ್ಕಾಗಿ ದುಡಿಯಬೇಡಿ;
ಉಳಿಯುವ ಮತ್ತು ನಿತ್ಯಜೀವವನ್ನು ನೀಡುವ ಆಹಾರಕ್ಕಾಗಿ ದುಡಿಯಿರಿ. ಇಂತಹ ಆಹಾರವನ್ನು ನಿಮಗೆ ನೀಡುವವನು
ನರಪುತ್ರನೇ. ಏಕೆಂದರೆ, ಪಿತನಾದ ದೇವರು ತಮ್ಮ ಅಧಿಕಾರ
ಮುದ್ರೆಯನ್ನು ಆತನ ಮೇಲೆ ಒತ್ತಿದ್ದಾರೆ,"
ಎಂದು ಉತ್ತರಕೊಟ್ಟರು.
28ಆಗ
ಆ ಜನರು,
"ದೇವರು ಮೆಚ್ಚುವಂತೆ ನಡೆದುಕೊಳ್ಳಬೇಕಾದರೆ, ನಾವೇನು
ಮಾಡಬೇಕು?"
ಎಂದು ಕೇಳಿದರು.
29ಅದಕ್ಕೆ
ಯೇಸು,
"ದೇವರು ಕಳುಹಿಸಿದಾತನನ್ನು ನೀವು ವಿಶ್ವಾಸಿಸಬೇಕು. ಇದೇ ಅವರು ಮೆಚ್ಚುವ ಕಾರ್ಯ,"
ಎಂದರು.
30ಅದಕ್ಕೆ
ಆ ಜನರು,
"ನಾವು ನಿಮ್ಮಲ್ಲಿ ವಿಶ್ವಾಸವಿಡುವಂತೆ, ನೀವೇನು ಮಾಡುವಿರಿ?
ಯಾವ ಸೂಚಕಕಾರ್ಯವನ್ನು ತೋರಿಸುವಿರಿ? 31ನಮ್ಮ ಪೂರ್ವಜರಿಗೆ ಮರುಭೂಮಿಯಲ್ಲಿ
ತಿನ್ನಲು 'ಮನ್ನಾ' ಸಿಕ್ಕಿತು. ತಿನ್ನಲು ಅವರಿಗೆ ಸ್ವರ್ಗದಿಂದ ರೊಟ್ಟಿ ದೊರಕಿತು, ಎಂದು ಪವಿತ್ರಗ್ರಂಥವೇ
ಹೇಳುತ್ತದೆಯಲ್ಲವೇ?"
ಎಂದರು.
32ಯೇಸು
ಅವರಿಗೆ,
"ನಿಮಗೆ ಸತ್ಯವಾಗಿ ಹೇಳುತ್ತೇನೆ: ಸ್ವರ್ಗದಿಂದ ನಿಮಗೆ
ರೊಟ್ಟಿಯನ್ನು ಕೊಟ್ಟವನು ಮೋಶೆಯಲ್ಲ; ನಿಮಗೆ ಸ್ವರ್ಗದಿಂದ ನಿಜವಾದ ರೊಟ್ಟಿಯನ್ನು ಕೊಡುವವರು ನನ್ನ
ಪಿತನೇ. 33ಏಕೆಂದರೆ, ಸ್ವರ್ಗದಿಂದ ಇಳಿದುಬಂದು
ಲೋಕಕ್ಕೆ ಸಜ್ಜೀವವನ್ನೀಯುವಾತನೇ ದೇವರು ಕೊಡುವ ರೊಟ್ಟಿ,"
ಎಂದು ಹೇಳಿದರು.
34ಅದಕ್ಕೆ
ಆ ಜನರು,
"ಅಂತಹಾ ರೊಟ್ಟಿಯನ್ನೇ ನಮಗೆ ಯಾವಾಗಲೂ ಕೊಡಿರಿ,"
ಎಂದು ಕೇಳಿದರು.
35ಆಗ
ಯೇಸು,
"ನಾನೇ ಜೀವದಾಯಕ ರೊಟ್ಟಿ, ನನ್ನ ಬಳಿ ಬರುವವನಿಗೆ
ಹಸಿವೆ ಇರದು; ನನ್ನಲ್ಲಿ ವಿಶ್ವಾಸವಿಡುವವನಿಗೆ ಎಂದಿಗೂ ದಾಹವಾಗದು. 36ಆದರೆ ನಾನು ನಿಮಗೆ ಹೇಳಿದಂತೆ, ನೀವು ನನ್ನನ್ನು ನೋಡಿಯೂ ವಿಶ್ವಾಸಿಸದೆ
ಇದ್ದೀರಿ. 37ಪಿತನು ನನಗೆಂದು ಕೊಟ್ಟಿರುವ
ಪ್ರತಿಯೊಬ್ಬನೂ ನನ್ನಲ್ಲಿಗೆ ಬರುತ್ತಾನೆ. ನನ್ನಲ್ಲಿಗೆ ಬರುವವನನ್ನು ನಾನೆಂದಿಗೂ ತಳ್ಳಿಬಿಡುವುದಿಲ್ಲ.
38ನಾನು ಸ್ವರ್ಗದಿಂದ ಇಳಿದು ಬಂದುದು
ನನ್ನ ಇಚ್ಚೆಯಂತೆ ನಡೆಯುವುದಕ್ಕಲ್ಲ. ನನ್ನನ್ನು ಕಳುಹಿಸಿದಾತನ ಚಿತ್ತದಂತೆ ನಡೆಯುವುದಕ್ಕೆ. 39ಅವರ ಚಿತ್ತವೇನೆಂದರೆ: ಅವರು ನನಗೆ ಕೊಟ್ಟವರಲ್ಲಿ ಒಬ್ಬನನ್ನೂ ಕಳೆದುಕೊಳ್ಳದೆ
ಅಂತಿಮ ದಿನದಂದು ಅವರೆಲ್ಲರನ್ನೂ ನಾನು ಜೀವಂತ ಎಬ್ಬಿಸಬೇಕು. 40ಪುತ್ರನನ್ನು ಕಂಡು ಆತನಲ್ಲಿ ವಿಶ್ವಾಸವಿಡುವ ಪ್ರತಿಯೊಬ್ಬನೂ ನಿತ್ಯಜೀವವನ್ನು
ಪಡೆಯಬೇಕೆಂಬುದೇ ನನ್ನ ಪಿತನ ಸಂಕಲ್ಪ. ಅಂತಹವನನ್ನು ಅಂತಿಮ ದಿನದಂದು ನಾನು ಜೀವಂತ ಎಬ್ಬಿಸುತ್ತೇನೆ,"
ಎಂದು ನುಡಿದರು. 41‘ಸ್ವರ್ಗದಿಂದ ಇಳಿದುಬಂದ ರೊಟ್ಟಿ
ನಾನೇ’ ಎಂದು ಯೇಸು ಹೇಳಿದ ಕಾರಣದಿಂದಾಗಿ ಯೆಹೂದ್ಯರು ಗೊಣಗತೊಡಗಿದರು.
42ಅವರು,
"ಈತನು ಜೋಸೆಫನ ಮಗನಾದ ಯೇಸುವಲ್ಲವೆ? ಈತನ ತಂದೆ-ತಾಯಿ
ನಮಗೆ ಗೊತ್ತಿಲ್ಲವೆ? ಅಂದ ಮೇಲೆ ನಾನು ಸ್ವರ್ಗದಿಂದ
ಬಂದಿದ್ದೇನೆ ಎಂದು ಈತನು ಹೇಳುವುದಾದರೂ ಹೇಗೆ?"
ಎಂದರು.
43ಅದಕ್ಕೆ
ಯೇಸು,
"ನಿಮ್ಮನಿಮ್ಮೊಳಗೆ ಗೊಣಗುಟ್ಟದಿರಿ. 44ನನ್ನನ್ನು ಕಳುಹಿಸಿಕೊಟ್ಟ ಪಿತನು, ನನ್ನತ್ತ ಸೆಳೆಯದ ಹೊರತು, ಯಾರೂ ನನ್ನ
ಬಳಿಗೆ ಬಾರರು. ಬಂದವರನ್ನು ನಾನು ಅಂತಿಮ ದಿನದಂದು ಜೀವಂತವಾಗಿ ಎಬ್ಬಿಸುತ್ತೇನೆ. 45'ದೇವರಿಂದಲೇ ಅವರೆಲ್ಲರೂ ಬೋಧನೆ ಪಡೆಯುವರು.' ಎಂದು ಪ್ರವಾದಿಗಳ ಗ್ರಂಥದಲ್ಲಿ
ಬರೆದಿದೆ. ಪಿತನಿಗೆ ಕಿವಿಗೊಟ್ಟು ಅವರಿಂದಲೇ ಕಲಿತುಕೊಂಡ ಪ್ರತಿಯೊಬ್ಬನೂ ನನ್ನ ಬಳಿಗೆ ಬರುತ್ತಾನೆ.
46ಹಾಗೆಂದ ಮಾತ್ರಕ್ಕೆ ಪಿತನನ್ನು
ಯಾರಾದರೂ ಕಣ್ಣಾರೆ ಕಂಡಿದ್ದಾರೆ ಎಂದಲ್ಲ, ದೇವರಿಂದ ಬಂದಿರುವವನೊಬ್ಬನು ಮಾತ್ರ ಪಿತನನ್ನು ಕಂಡಿದ್ದಾನೆ.
47ವಿಶ್ವಾಸವುಳ್ಳವನಲ್ಲಿ ನಿತ್ಯಜೀವವಿದೆಯೆಂದು
ನಾನು ನಿಮಗೆ ಸತ್ಯವಾಗಿ ಹೇಳುತ್ತೇನೆ. 48ಜೀವದಾಯಕ ರೊಟ್ಟಿಯು ನಾನೇ.
49ನಿಮ್ಮ ಪೂರ್ವಜರು ಮರಳುಗಾಡಿನಲ್ಲಿ
'ಮನ್ನಾ'ವನ್ನು ತಿಂದರು; ಆದರೂ ಸಾವಿಗೆ ತುತ್ತಾದರು. ಆದರೆ 50ಸ್ವರ್ಗದಿಂದ ಇಳಿದು ಬಂದ ರೊಟ್ಟಿ ಹಾಗಲ್ಲ. ಇದನ್ನು ತಿನ್ನುವ ಯಾರಿಗೂ
ಸಾವೆಂಬುದು ಇಲ್ಲ. 51ನಾನೇ ಸ್ವರ್ಗದಿಂದ ಇಳಿದು ಬಂದ
ಜೀವಂತ ರೊಟ್ಟಿ ಈ ರೊಟ್ಟಿಯನ್ನು ತಿಂದವನು ಚಿರಕಾಲ ಬಾಳುತ್ತಾನೆ. ಲೋಕೋದ್ಧಾರಕ್ಕಾಗಿ ನಾನು ಅರ್ಪಿಸುವ
ನನ್ನ ಮಾಂಸವೇ ನಾನು ಕೊಡುವ ರೊಟ್ಟಿ,"
ಎಂದು ಹೇಳಿದರು.
52ಅಷ್ಟಕ್ಕೆ
ಆ ಯೆಹೂದ್ಯರಲ್ಲಿ ತೀವ್ರ ವಾಗ್ವಾದ ಉಂಟಾಯಿತು.
"ಈತನು ತನ್ನ ಮಾಂಸವನ್ನು ತಿನ್ನಲು ಹೇಗೆ ಕೊಡುತ್ತಾನೆ?"
ಎಂದು ಕೇಳತೊಡಗಿದರು.
53ಅದಕ್ಕೆ
ಯೇಸು,
"ನಾನು ನಿಮಗೆ ಸತ್ಯವಾಗಿ ಹೇಳುತ್ತೇನೆ: ನೀವು ನರಪುತ್ರನ
ಮಾಂಸವನ್ನು ತಿನ್ನದೆ, ಆತನ ರಕ್ತವನ್ನು ಕುಡಿಯದೆ ಹೋದರೆ ನಿಮ್ಮಲ್ಲಿ ಜೀವವಿರುವುದಿಲ್ಲ. 54ನನ್ನ ಮಾಂಸವನ್ನು ತಿಂದು ನನ್ನ ರಕ್ತವನ್ನು ಕುಡಿಯುವವನಲ್ಲಿ ನಿತ್ಯಜೀವ
ಇರುತ್ತದೆ. ಅಲ್ಲದೆ ಅಂತಿಮ ದಿನದಂದು ನಾನು ಅವನನ್ನು ಜೀವಂತವಾಗಿ ಎಬ್ಬಿಸುತ್ತೇನೆ. 55ನನ್ನ ಮಾಂಸವೇ ನಿಜವಾದ ಆಹಾರ; ನನ್ನ ರಕ್ತವೇ ನಿಜವಾದ ಪಾನ. 56ನನ್ನ ಮಾಂಸವನ್ನು ತಿಂದು, ನನ್ನ ರಕ್ತವನ್ನು ಕುಡಿಯುವವನು ನನ್ನಲ್ಲಿ ನೆಲೆಸಿರುತ್ತಾನೆ.
ನಾನೂ ಅವನಲ್ಲಿ ನೆಲೆಸಿರುತ್ತೇನೆ. 57ಜೀವಸ್ವರೂಪಿಯಾದ ಪಿತನು ನನ್ನನ್ನು
ಕಳುಹಿಸಿಕೊಟ್ಟಿರುವರು. ನಾನು ಅವರಿಂದಲೇ ಜೀವಿಸುತ್ತೇನೆ. ಅಂತೆಯೇ ನನ್ನನ್ನು ಭುಜಿಸುವವನು ನನ್ನಿಂದಲೇ
ಜೀವಿಸುತ್ತಾನೆ. 58ಸ್ವರ್ಗದಿಂದ ಇಳಿದು ಬಂದ ರೊಟ್ಟಿ
ಇದೇನೆ. ನಿಮ್ಮ ಪೂರ್ವಜರು 'ಮನ್ನಾ'ವನ್ನು ತಿಂದರೂ ಸಾವಿಗೆ ತುತ್ತಾದರು. ಇದು ಹಾಗಲ್ಲ. ಈ ರೊಟ್ಟಿಯನ್ನು
ತಿನ್ನುವವನು ಚಿರಕಾಲ ಬಾಳುವನು,"
ಎಂದು ಹೇಳಿದರು. 59ಕಫರ್ನೌಮಿನ ಪ್ರಾರ್ಥನಾಮಂದಿರದಲ್ಲಿ ಯೇಸು ಬೋಧನೆ ಮಾಡುತ್ತಿದ್ದಾಗ ಆಡಿದ
ಮಾತುಗಳಿವು.
ಜೀವದಾಯಕ ನುಡಿ
60ಯೇಸುವಿನ
ಹಿಂಬಾಲಕರಲ್ಲಿ ಹಲವರು,
"ಇವು ಕಟುವಾದ ಮಾತುಗಳು, ಇವನ್ನು ಕೇಳುವವರು ಯಾರು?"
ಎಂದು ಮಾತನಾಡಿಕೊಂಡರು. 61ಈ ವಿಷಯವಾಗಿ ತಮ್ಮ ಹಿಂಬಾಲಕರು ಗೊಣಗುಟ್ಟುತ್ತಿರುವುದನ್ನು ಯೇಸು ತಾವಾಗಿಯೇ
ಅರಿತು,
"ಇಷ್ಟು ಮಾತ್ರಕ್ಕೆ ನೀವು ಕಂಗೆಡಬೇಕೆ? 62ಹಾಗಾದರೆ ನರಪುತ್ರನು ತಾನು ಮೊದಲಿದ್ದ ಸ್ಥಳಕ್ಕೆ ಮರಳಿ ಏರುವುದನ್ನು ನೀವು
ಕಂಡಾಗ ಏನನ್ನುವಿರಿ? 63ಸಜ್ಜೀವವನ್ನು ಕೊಡುವಂತಾದ್ದು
ದೇವರ ಆತ್ಮವೇ. ನರಮಾಂಸದಿಂದ ಏನೂ ಆಗದು. ನಾನು ನಿಮ್ಮೊಡನೆ ಆಡಿದ ಮಾತುಗಳು ಜೀವದಾಯಕ ದೇವರಾತ್ಮವನ್ನು
ತರುತ್ತವೆ. 64ಆದರೂ ನಿಮ್ಮಲ್ಲಿ ಕೆಲವರಿಗೆ
ವಿಶ್ವಾಸವಿಲ್ಲ,"
ಎಂದು ಹೇಳಿದರು. (ವಿಶ್ವಾಸವಿಲ್ಲದವರು ಯಾರು, ತಮ್ಮನ್ನು
ಹಿಡಿದುಕೊಡುವ ಗುರುದ್ರೋಹಿ ಯಾರು ಎಂಬುದು ಯೇಸುವಿಗೆ ಮೊದಲಿನಿಂದಲೂ ತಿಳಿದಿತ್ತು).
65"'ಪಿತನು
ಅನುಗ್ರಹಿಸದ ಹೊರತು ಯಾರೂ ನನ್ನ ಬಳಿಗೆ ಬರಲಾರರು' ಎಂದು ನಾನು ಹೇಳಿದ್ದು ಇದಕ್ಕಾಗಿಯೇ,"
ಎಂದು ಯೇಸು ಮತ್ತೆ ನುಡಿದರು.
ಪೇತ್ರನ ವಿಶ್ವಾಸ ಪ್ರಮಾಣ
66ಅಂದಿನಿಂದ
ಯೇಸುವಿನ ಹಿಂಬಾಲಕರಲ್ಲಿ ಹಲವರು ಅವರ ಸಹವಾಸವನ್ನು ಬಿಟ್ಟುಬಿಟ್ಟರು. ಹೋದವರು ಹಿಂತಿರುಗಿ ಬರಲಿಲ್ಲ.
67ಆಗ ಯೇಸು ಹನ್ನೆರಡು ಮಂದಿ ಶಿಷ್ಯರಿಗೆ,
"ನೀವೂ ಹೋಗಬೇಕೆಂದಿದ್ದೀರಾ?"
ಎಂದು ಕೇಳಿದರು.
68ಅದಕ್ಕೆ
ಸಿಮೋನ ಪೇತ್ರನು,
"ಪ್ರಭುವೇ, ನಾವು ಹೋಗುವುದಾದರೂ ಯಾರ ಬಳಿಗೆ? ನಿತ್ಯಜೀವವನ್ನು
ಕೊಡುವ ನುಡಿ ಇರುವುದು ತಮ್ಮಲ್ಲೇ. 69ತಾವೇ ದೇವರಿಂದ ಬಂದ ಪರಮಪೂಜ್ಯರು.
ಹೌದು, ಇದೇ ನಮ್ಮ ವಿಶ್ವಾಸ ಮತ್ತು ನಂಬಿಕೆ,"
ಎಂದು ಹೇಳಿದನು.
70ಆಗ
ಯೇಸು,
"ನಿಮ್ಮಲ್ಲಿ ಹನ್ನೆರಡು ಮಂದಿಯನ್ನು ನಾನು ಆಯ್ದುಕೊಂಡೆನಲ್ಲವೆ;
ಆದರೂ ನಿಮ್ಮಲ್ಲಿ ಒಬ್ಬನು ಪಿಶಾಚಿಯಾಗಿದ್ದಾನೆ,"
ಎಂದರು.
71ಅವರು
ಹೀಗೆ ಹೇಳಿದ್ದು ಸಿಮೋನನ ಮಗ ಇಸ್ಕಾರಿಯೋತಿನ ಯೂದನನ್ನು ಕುರಿತು. ಹನ್ನೆರಡು ಮಂದಿಯಲ್ಲಿ ಒಬ್ಬನಾಗಿದ್ದ
ಇವನೇ ಯೇಸುವನ್ನು ಹಿಡಿದುಕೊಡಲಿದ್ದ ಗುರುದ್ರೋಹಿ.
ಅಧ್ಯಾಯಗಳು
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್‌ ಮಾಡಿ