ಯೊವಾನ್ನನು ಬರೆದ ಸುಸಂದೇಶ: ಅಧ್ಯಾಯ 7

ಯೇಸು ಮತ್ತು ಸೋದರರು

¹ಇದಾದ ಬಳಿಕ ಯೇಸು ಗಲಿಲೇಯದಲ್ಲಿ ಸಂಚರಿಸತೊಡಗಿದರು. ಯೆಹೂದ್ಯರು ತಮ್ಮನ್ನು ಕೊಲ್ಲಲು ಹವಣಿಸುತ್ತಿದ್ದುದರಿಂದ ಜುದೇಯದಲ್ಲಿ ಸಂಚರಿಸಲು ಅವರು ಇಷ್ಟಪಡಲಿಲ್ಲ. ²ಯೆಹೂದ್ಯರ ಪರ್ಣಕುಟೀರಗಳ ಹಬ್ಬವು ಸಮೀಪಿಸುತ್ತಿತ್ತು.

ಯೇಸುವಿನ ಸೋದರರು,

³"ನೀನು ಇಲ್ಲಿಂದ ಜುದೇಯಕ್ಕೆ ಹೋಗು. ಅಲ್ಲಿ ನೀನು ಮಾಡುವುದನ್ನೆಲ್ಲಾ ನಿನ್ನ ಅನುಯಾಯಿಗಳು ನೋಡಲಿ. ⁴ಪ್ರಖ್ಯಾತನಾಗಬೇಕೆಂದಿರುವ ಯಾರೂ ತನ್ನ ಕಾರ್ಯಗಳನ್ನು ಮರೆಯಲ್ಲಿ ಮಾಡುವುದಿಲ್ಲ. ಇವನ್ನೆಲ್ಲಾ ನೀನು ಮಾಡುವುದಾದರೆ ಲೋಕಕ್ಕೆ ಪ್ರಕಟವಾಗುವಂತೆ ಮಾಡಬೇಕು,"

ಎಂದು ಯೇಸುವಿಗೆ ಹೇಳಿದರು. ⁵ಅವರ ಸೋದರರಿಗೆ ಕೂಡ ಅವರಲ್ಲಿ ವಿಶ್ವಾಸವಿರಲಿಲ್ಲ. ⁶ಅದಕ್ಕೆ ಯೇಸು,

"ನನಗಿನ್ನೂ ಸೂಕ್ತ ಸಮಯ ಬಂದಿಲ್ಲ. ನಿಮಗಾದರೆ ಎಲ್ಲಾ ಸಮಯವೂ ಒಂದೇ. ⁷ಲೋಕಕ್ಕೆ ನಿಮ್ಮ ಮೇಲೆ ಹಗೆಯಿಲ್ಲ. ಅದಕ್ಕೆ ಹಗೆಯಿರುವುದು ನನ್ನ ಮೇಲೆ. ಏಕೆಂದರೆ, ಅದರ ವರ್ತನೆ ಕೆಟ್ಟದ್ದೆಂದು ನಾನು ಯಥಾರ್ಥವಾಗಿ ಹೇಳುತ್ತಾ ಇದ್ದೇನೆ. ⁸ಹಬ್ಬಕ್ಕೆ ನೀವೇ ಹೋಗಿರಿ. ನನಗೆ ಸಮಯವು ಇನ್ನೂ ಬಂದಿಲ್ಲವಾದ ಕಾರಣ ನಾನು ಹಬ್ಬಕ್ಕೆ ಈಗ ಹೋಗುವುದಿಲ್ಲ,"

ಎಂದು ಹೇಳಿ ⁹ಯೇಸು ಗಲಿಲೇಯದಲ್ಲೇ ಉಳಿದುಕೊಂಡರು.

ತೀರ್ಪು ನ್ಯಾಯಬದ್ಧವಾಗಿರಬೇಕು

¹⁰ಯೇಸುವಿನ ಸೋದರರು ಹಬ್ಬಕ್ಕೆ ಹೋದರು. ಯೇಸುವೂ ಅಲ್ಲಿಗೆ ಹೋದರು. ಬಹಿರಂಗವಾಗಿ ಅಲ್ಲ, ಗುಟ್ಟಾಗಿ. ¹¹ಹಬ್ಬದ ಸಮಯದಲ್ಲಿ ಯೇಸು ಎಲ್ಲಿದ್ದಾರೆಂದು ಯೆಹೂದ್ಯರು ಹುಡುಕುತ್ತಿದ್ದರು. ಅವರನ್ನು ಕುರಿತು ಜನರ ಗುಂಪು ಗುಸುಗುಸು ಮಾತನಾಡುತ್ತಿತ್ತು.

¹²'ಆತ ಒಳ್ಳೆಯ ವ್ಯಕ್ತಿ,'

ಎಂದು ಕೆಲವರು ಹೇಳಿದರೆ,

'ಇಲ್ಲಾ, ಆತನು ಜನರನ್ನು ಅಡ್ಡದಾರಿಗೆ ಎಳೆಯುತ್ತಿದ್ದಾನೆ,'

ಎಂದು ಇತರರು ಹೇಳುತ್ತಿದ್ದರು. ¹³ಯೆಹೂದ್ಯರಿಗೆ ಹೆದರಿ ಅವರಾರೂ ಬಹಿರಂಗವಾಗಿ ಮಾತನಾಡುತ್ತಿರಲಿಲ್ಲ. ¹⁴ಹಬ್ಬವು ಅರ್ಧಕ್ಕರ್ಧ ಮುಗಿಯಿತು. ಆಗ ಯೇಸು ಮಹಾ ದೇವಾಲಯಕ್ಕೆ ಹೋಗಿ ಬೋಧನೆ ಮಾಡತೊಡಗಿದರು. ¹⁵ಅದನ್ನು ಕೇಳಿ ಯೆಹೂದ್ಯ ಅಧಿಕಾರಿಗಳು ಬೆರಗಾದರು.

"ಕಲಿಯದಿದ್ದರೂ ಈ ಮನುಷ್ಯನಿಗೆ ಇಷ್ಟೆಲ್ಲಾ ಪಾಂಡಿತ್ಯ ಎಲ್ಲಿಂದ ಬಂತು?"

ಎಂದು ವಿಚಾರಿಸತೊಡಗಿದರು.

¹⁶ಆಗ ಯೇಸು,

"ನಾನು ಮಾಡುವ ಬೋಧನೆ ನನ್ನದಲ್ಲ; ನನ್ನನ್ನು ಕಳುಹಿಸಿದಾತನದು. ¹⁷ದೇವರ ಚಿತ್ತದಂತೆ ನಡೆಯಲು ಮನಸ್ಸುಳ್ಳವನಿಗೆ ನಾನು ಬೋಧಿಸುವುದು ದೇವರಿಂದ ಬಂದುದೋ; ನನ್ನ ಸ್ವಂತ ಕಲ್ಪನೆಯೋ ಎಂಬುದು ತಿಳಿಯುತ್ತದೆ. ¹⁸ಸ್ವಂತ ಕಲ್ಪನೆಯಿಂದ ಮಾತನಾಡುವವನು ತನ್ನ ಸ್ವಪ್ರತಿಷ್ಟೆಯನ್ನು ಬಯಸುತ್ತಾನೆ. ತನ್ನನ್ನು ಕಳುಹಿಸದಾತನ ಪ್ರತಿಷ್ಟೆಯನ್ನು ಬಯಸುವವನು ಪ್ರಾಮಾಣಿಕನು. ಕಪಟವೆಂಬುದು ಅವನಲ್ಲಿ ಇರದು. ¹⁹ಮೋಶೆಯು ಕೊಟ್ಟ ಧರ್ಮಶಾಸ್ತ್ರವು ನಿಮ್ಮಲ್ಲಿದೆಯಲ್ಲವೇ? ಆದರೂ ಅದರ ಪ್ರಕಾರ ನಡೆಯುವವರಾರೂ ನಿಮ್ಮಲ್ಲಿ ಇಲ್ಲ. ನನ್ನನ್ನು ಕೊಲ್ಲಬೇಕೆಂದು ನೀವು ಹವಣಿಸುವುದೇಕೆ?" ಎಂದರು. ²⁰ಅದಕ್ಕೆ ಆ ಜನರು, "ನಿನಗೆ ದೆವ್ವ ಹಿಡಿದಿರಬೇಕು; ನಿನ್ನನ್ನು ಕೊಲ್ಲಲು ಹವಣಿಸುತ್ತಿರುವವರಾದರೂ ಯಾರು?" ಎಂದರು. ²¹ಯೇಸು ಅವರಿಗೆ, "ಸಬ್ಬತ್‌ದಿನ ನಾನು ಮಾಡಿದ ಸೂಚಕಕಾರ್ಯ ಒಂದೇ ಒಂದು. ಅಷ್ಟಕ್ಕೆ ನೀವೆಲ್ಲರೂ ಕಂಗಾಲಾಗಿದ್ದೀರಿ. ²²ಸುನ್ನತಿಯನ್ನು ಆಚರಿಸಬೇಕೆಂದು ನಿಯಮಿಸಿದವನು ಮೋಶೆ. (ವಾಸ್ತವವಾಗಿ ಅದು ಮೋಶೆಯ ಕಾಲದಿಂದಲ್ಲ, ಪೂರ್ವಜರ ಕಾಲದಿಂದಲೂ ರೂಢಿಯಲ್ಲಿತ್ತು). ಸಬ್ಬತ್‌ದಿನದಲ್ಲಿಯೂ ನೀವು ಸುನ್ನತಿಯನ್ನು ಮಾಡುವುದುಂಟು. ²³ಮೋಶೆಯ ನಿಯಮವನ್ನು ಉಲ್ಲಂಘಿಸದೆ ನೀವು ಸಬ್ಬತ್‌ದಿನದಲ್ಲಿ ಒಬ್ಬನಿಗೆ ಸುನ್ನತಿ ಮಾಡಬಹುದಾದರೆ ಅದೇ ಸಬ್ಬತ್‌ದಿನದಲ್ಲಿ ನಾನೂ ಒಬ್ಬ ಮನುಷ್ಯನನ್ನು ಸಂಪುರ್ಣ ಸ್ವಸ್ಥಪಡಿಸಿದ್ದಕ್ಕೆ ನೀವು ಸಿಟ್ಟಾಗಬೇಕೆ? ²⁴ಬರಿಯ ತೋರಿಕೆಗೆ ತೀರ್ಪುಕೊಡುವುದು ಸಲ್ಲದು; ನಿಮ್ಮ ತೀರ್ಪು ನ್ಯಾಯಬದ್ಧವಾಗಿರಬೇಕು,"

ಎಂದು ಹೇಳಿದರು.

ಇವರೇ ಲೋಕೋದ್ಧಾರಕರು!

²⁵ಯೇಸುವಿನ ಮಾತನ್ನು ಕೇಳಿದ ಜೆರುಸಲೇಮಿನ ಕೆಲವರು,

"ಯೆಹೂದ್ಯರು ಕೊಲ್ಲಬೇಕೆಂದು ಹವಣಿಸುತ್ತಿರುವುದು ಈತನನ್ನೇ ಅಲ್ಲವೇ? ಇದೋ, ಈತ ಬಹಿರಂಗವಾಗಿ ಮಾತನಾಡುತ್ತಿದ್ದಾನೆ. ²⁶ಆದರೂ ಈತನ ವಿರುದ್ಧ ಯಾರೂ ಧ್ವನಿಯೆತ್ತುತ್ತಿಲ್ಲ! ಈತನೇ ಲೋಕೋದ್ಧಾರಕನೆಂದು ಅವರಿಗೆ ಹೊಳೆದಿರಬಹುದೇ? ²⁷ಲೋಕೋದ್ಧಾರಕನು ಕಾಣಿಸಿಕೊಳ್ಳುವಾಗ ಆತ ಎಲ್ಲಿಂದ ಬಂದನೆಂದು ಯಾರಿಗೂ ತಿಳಿಯುವುದಿಲ್ಲ. ಆದರೆ ಈತ ಎಲ್ಲಿಂದ ಬಂದ ಎಂಬುದು ನಮ್ಮೆಲ್ಲರಿಗೂ ತಿಳಿದಿದೆಯಲ್ಲಾ!"

ಎಂದು ತಮ್ಮತಮ್ಮೊಳಗೆ ಮಾತನಾಡಿಕೊಂಡರು. ²⁸ದೇವಾಲಯದಲ್ಲಿ ಬೋಧಿಸುತ್ತಿದ್ದ ಯೇಸು ಆಗ ಗಟ್ಟಿಯಾದ ಧ್ವನಿಯಲ್ಲಿ,

"ನಾನು ಯಾರೆಂದು, ಎಲ್ಲಿಂದ ಬಂದೆನೆಂದು ನೀವು ಬಲ್ಲಿರಾ? ನಾನು ನನ್ನಷ್ಟಕ್ಕೆ ಬಂದವನಲ್ಲ; ನನ್ನನ್ನು ಕಳುಹಿಸಿದಾತನು ಸತ್ಯಸ್ವರೂಪಿ. ಆತನನ್ನು ನೀವು ಅರಿತಿಲ್ಲ. ²⁹ಆದರೆ ನಾನಾತನನ್ನು ಅರಿತಿದ್ದೇನೆ. ಏಕೆಂದರೆ ನಾನು ಬಂದದ್ದು ಆತನಿಂದಲೇ. ಆತನೇ ನನ್ನನ್ನು ಕಳುಹಿಸಿದ್ದು,"

ಎಂದರು.

³⁰ಇದನ್ನು ಕೇಳಿದ ಯೆಹೂದ್ಯರು ಯೇಸುವನ್ನು ಹಿಡಿದು ಬಂಧಿಸಲು ಪ್ರಯತ್ನಿಸಿದರು. ಆದರೆ ಅವರ ಗಳಿಗೆಯು ಬಾರದಿದ್ದ ಕಾರಣ ಯಾರೂ ಅವರ ಮೇಲೆ ಕೈಹಾಕಲಾಗಲಿಲ್ಲ. ³¹ಅಲ್ಲಿ ನೆರೆದಿದ್ದ ಹಲವರಿಗೆ ಯೇಸುವಿನಲ್ಲಿ ನಂಬಿಕೆ ಹುಟ್ಟಿತು.

"ಲೋಕೋದ್ಧಾರಕ ಬಂದಾಗ ಈತ ಮಾಡಿದ್ದಕ್ಕೂ ಮಿಗಿಲಾದ ಸೂಚಕಕಾರ್ಯಗಳನ್ನು ಮಾಡುವನೇ?"

ಎಂದುಕೊಂಡರು.

ಯೇಸುವನ್ನು ಬಂಧಿಸಲು ಸಂಚು

³²ಹೀಗೆ ಯೇಸುವನ್ನು ಕುರಿತು ಜನರಾಡುತ್ತಿದ್ದ ಗುಸುಗುಸು ಮಾತುಗಳು ಫರಿಸಾಯರ ಕಿವಿಯನ್ನು ಮುಟ್ಟಿತು. ಅವರೂ ಮುಖ್ಯಯಾಜಕರೂ ಯೇಸುವನ್ನು ಬಂಧಿಸಲು ಕಾವಲಾಳುಗಳನ್ನು ಕಳುಹಿಸಿದರು.

³³ಆಗ ಯೇಸು,

"ಇನ್ನು ತುಸುಕಾಲ ಮಾತ್ರ ನಾನು ನಿಮ್ಮೊಡನೆ ಇರುತ್ತೇನೆ. ಅನಂತರ ನನ್ನನ್ನು ಕಳುಹಿಸಿದಾತನ ಬಳಿಗೆ ಹೊರಟುಹೋಗುತ್ತೇನೆ. ³⁴ಆಗ ನೀವು ನನ್ನನ್ನು ಹುಡುಕುವಿರಿ. ಆದರೆ ನಾನು ನಿಮಗೆ ಕಾಣಲು ಸಿಗುವುದಿಲ್ಲ. ನಾನು ಇರುವಲ್ಲಿಗೆ ನೀವು ಬರುವಂತೆಯೂ ಇಲ್ಲ,"

ಎಂದು ಹೇಳಿದರು.

³⁵ಯೆಹೂದ್ಯ ಅಧಿಕಾರಿಗಳು,

"ನಮಗೆ ಕಾಣಲು ಸಿಗದ ಹಾಗೆ ಇವನು ಎಲ್ಲಿಗೆ ಹೋಗುತ್ತಾನೆ? ಗ್ರೀಕರ ನಡುವೆ ಚದರಿ ಹೋಗಿರುವ ಯೆಹೂದ್ಯರಲ್ಲಿಗೆ ಹೋಗಿ ಅವರಿಗೆ ಬೋಧಿಸುವನೆ? ³⁶'ನನ್ನನ್ನು ಅರಸುವಿರಿ, ಆದರೆ ನಾನು ನಿಮಗೆ ಕಾಣಸಿಗುವುದಿಲ್ಲ. ನಾನಿರುವಲ್ಲಿಗೆ ನೀವು ಬರುವಂತಿಲ್ಲ' ಎಂದು ಇವನು ಹೇಳುವುದರ ಅರ್ಥವೇನು?"

ಎಂದು ತಮ್ಮತಮ್ಮೊಳಗೆ ಮಾತನಾಡಿಕೊಂಡರು.

ಜೀವದಾಯಕ ಹೊನಲು

³⁷ಹಬ್ಬದ ಕೊನೆಯ ದಿನ ಮಹಾದಿನವಾಗಿತ್ತು.

ಅಂದು ಯೇಸು ಅಲ್ಲಿ ನಿಂತುಕೊಂಡು,

"ಬಾಯಾರಿದವನು ನನ್ನ ಬಳಿಗೆ ಬಂದು ಕುಡಿಯಲಿ. ³⁸ಪವಿತ್ರಗ್ರಂಥದಲ್ಲಿ ಹೇಳಿರುವಂತೆ, ನನ್ನಲ್ಲಿ ವಿಶ್ವಾಸವಿಡುವವನ ಹೃದಯದಿಂದ ಜೀವಜಲವು ಹೊನಲುಹೊನಲಾಗಿ ಹರಿಯುವುದು,"

ಎಂದು ಗಟ್ಟಿಯಾದ ಧ್ವನಿಯಲ್ಲಿ ಹೇಳಿದರು. ³⁹ತಮ್ಮಲ್ಲಿ ವಿಶ್ವಾಸವಿಡುವವರು ಪಡೆಯಲಿರುವ ಪವಿತ್ರಾತ್ಮರನ್ನು ಕುರಿತೇ ಯೇಸು ಹೀಗೆ ಹೇಳಿದ್ದು. ಪವಿತ್ರಾತ್ಮನು ಇನ್ನೂ ಬಂದಿರಲಿಲ್ಲ. ಏಕೆಂದರೆ, ಯೇಸು ಇನ್ನೂ ಮೇಲೇರಿ ಮಹಿಮೆಯನ್ನು ಪಡೆದಿರಲಿಲ್ಲ.

ಜನರ ಭಾವನೆಗಳು ಭಿನ್ನ

⁴⁰ಇದನ್ನು ಕೇಳಿ ನೆರೆದಿದ್ದವರಲ್ಲಿ ಕೆಲವರು,

"ಬರಬೇಕಾಗಿದ್ದ ಪ್ರವಾದಿ ಈತನೇ ಸರಿ,"

ಎಂದರು.

⁴¹ಇನ್ನೂ ಕೆಲವರು,

"ಈತನೇ ಲೋಕೋದ್ಧಾರಕ,"

ಎಂದರು.

ಮತ್ತೆ ಕೆಲವರು,

"ಲೋಕೋದ್ಧಾರಕ ಗಲಿಲೇಯದಿಂದ ಬರುವುದುಂಟೇ? ⁴²ಆತ ದಾವೀದನ ವಂಶಜ; ಆತನು ಹುಟ್ಟುವುದು ದಾವೀದನ ಊರಾದ ಬೆತ್ಲೆಹೆಂನಲ್ಲಿ ಎಂದು ಪವಿತ್ರಗ್ರಂಥದಲ್ಲಿ ಹೇಳಿದೆಯಲ್ಲವೇ?"

ಎಂದು ವಾದಿಸಿದರು. ⁴³ಹೀಗೆ ಯೇಸುವಿನ ಕುರಿತು ಜನರಲ್ಲಿ ಭಿನ್ನ ಭಿನ್ನ ಅಭಿಪ್ರಾಯಗಳು ಮೂಡಿದವು. ⁴⁴ಕೆಲವರಿಗಂತೂ ಯೇಸುವನ್ನು ಹಿಡಿದು ಬಂಧಿಸಬೇಕೆನಿಸಿತು. ಆದರೆ ಯಾರೂ ಅವರ ಮೇಲೆ ಕೈಹಾಕಲು ಮುಂದಾಗಲಿಲ್ಲ.

ವಿಶ್ವಾಸಹೀನ ಮುಖಂಡರು

⁴⁵ಕಾವಲಾಳುಗಳು ಹಿಂದಿರುಗಿದಾಗ, ಮುಖ್ಯಯಾಜಕರು ಮತ್ತು ಫರಿಸಾಯರು,

"ನೀವು ಅವನನ್ನೇಕೆ ಹಿಡಿದು ತರಲಿಲ್ಲ?"

ಎಂದು ಕೇಳಿದರು.

⁴⁶ಅವರು,

"ಆತನು ಮಾತನಾಡಿದ ಹಾಗೆ ಯಾರೂ ಕೂಡ ಮಾತನಾಡಿರಲಿಲ್ಲ,"

ಎಂದು ಉತ್ತರಿಸಿದರು.

⁴⁷ಅದಕ್ಕೆ ಫರಿಸಾಯರು,

"ಏನು? ನೀವೂ ಕೂಡ ಅವನಿಗೆ ಮರುಳಾಗಿಬಿಟ್ಟಿರಾ? ⁴⁸ನಮ್ಮ ಮುಖಂಡರಲ್ಲಾಗಲಿ, ಫರಿಸಾಯರಲ್ಲಾಗಲಿ ಯಾರಾದರೂ ಅವನನ್ನು ನಂಬಿದ್ದುಂಟೆ? ⁴⁹ಧರ್ಮಶಾಸ್ತ್ರದ ಗಂಧವೂ ಇಲ್ಲದ ಜನಜಂಗುಳಿ ಶಾಪಗ್ರಸ್ತವಾಗಿದೆ,"

ಎಂದರು. ⁵⁰ಅಲ್ಲಿದ್ದ ಫರಿಸಾಯರಲ್ಲಿ ನಿಕೊದೇಮನು ಒಬ್ಬನು. ಹಿಂದೆ ಈತ ಯೇಸುವನ್ನು ಕಾಣಲು ಬಂದಿದ್ದ. ⁵¹ಈತನು ಅವರಿಗೆ,

"ಒಬ್ಬ ವ್ಯಕ್ತಿಯ ಹೇಳಿಕೆಯನ್ನು ಕೇಳದೆ ಆತನು ಮಾಡಿರುವುದನ್ನು ಕಂಡುಕೊಳ್ಳದೆ, ಆತನನ್ನು ದೋಷಿಯೆಂದು ನಿರ್ಧರಿಸುವುದು ಶಾಸ್ತ್ರಸಮ್ಮತವೇ?"

ಎಂದು ಕೇಳಿದನು.

⁵²ಅದಕ್ಕೆ ಅವರು,

"ನೀನೂ ಗಲಿಲೇಯದವನಾ? ಪವಿತ್ರಗ್ರಂಥವನ್ನು ಓದಿ ನೋಡು; ಗಲಿಲೇಯದಿಂದ ಯಾವ ಪ್ರವಾದಿಯೂ ತಲೆಯೆತ್ತುವುದಿಲ್ಲ, ಎಂಬುದು ನಿನಗೆ ಗೊತ್ತಾಗುತ್ತದೆ,"

ಎಂದು ಎದುರುತ್ತರ ನೀಡಿದನು. ⁵³ಬಳಿಕ ಎಲ್ಲರೂ ತಮ್ಮತಮ್ಮ ಮನೆಗಳಿಗೆ ತೆರಳಿದರು.

ಅಧ್ಯಾಯಗಳು